Hijian Internasional (hijian ukur)
Sistim Hijian Internasional (Basa Prancis: Système International d'Unités atawa SI) nyaéta rupa modéren tina sistim métrik jeung ayeuna téh jadi sistim pangukuran nu pangremenna dipaké ku loba jelma. Ieu sistim diwangun ku sistim pangukuran nu kohérén nu museur kana 7 hijian bagbagan, nyaéta detik, méter, kilogram, ampere, kélvin, mol, jeung kandela, sauyunan jeung hiji sét nu eusina 20 rarangkén hareup pikeun ngaran jeung simbul hijian nu bisa dipaké keur nangtukeun titilepan jeung peupeusan. Ieu sistim gé nangtukeun ngaran 22 hijian turunan, kawas lumen jeung watt, pikeun babadagan séjénna.
