Kartu pamanteng tivi (Basa Indonésia: kartu penala TV Basa Inggris: TV tuner card) nyaéta pakakas komputer anu bisa ngajadikeun komputer sanggup mrosés sinyal televisi pikeun dipintonkeun dina layar monitor. Lolobana kartu pamanteng tivi ogé boga fungsi ganda minangka kartu nu nangkep gambar vidéo (basa Inggris: vidéo capture card) antukna komputer bisa ngarékam acara televisi kana hard disk atawa média panyimpen séjénna.

Hiji kartu pamanteng tivi

Biasana kartu ieu dipasang dina slot PCI dina motherboard, sanajan aya sawatara anu dipasang dina port USB. Sawatara kartu grafis ogé ngarangkep minangka pamanteng tivi. Biasana kartu ieu diwangun ku bagian panarima (receiver), pamanteng (tuner), demodulator sarta pangobah sinyal analog jadi digital pikeun TV analog. Kawas pakakas televisi, pamanteng tivi dirarancang pikeun frékuénsi radio sarta format vidéo anu lumaku di unggal nagarana. Minangka tambahan, réa anu nyartakeun input vidéo komposit. Réa pamanteng tivi anu ogé bisa ngulinkeun radio FM. Hal ieu meureun alatan spéktrum gelombang radio ngagunakeun frékuénsi anu sarupa jeung télévisi. Lolobana pamanteng internal ngalakonan pamrosésan sinyal pikeun ngarobah sinyal radio jadi gambar dina layar. Malah mah aya sababaraha anu langsung nyambung kana kartu sora sarta kartu grafis antukna henteu merlukeun CPU (tapi CPU tetep waé dipaké pikeun ngajalankeun aplikasi).

Kiwari réa pamanteng tivi ngarojong siaran TV digital anu boga standar HDTV. Ieu leuwih murah batan meuli pesawat TV kalayan pakakas pangrojong HDTV. Siaran ogé bisa dirékam pikeun dimaénkeun deui.