Acép Zamzam Noor

Acép Zamzam Noor

Acép Zamzam Noor lahir di Tasikmalaya, 28 Februari 1960. Panyajak dina basa Indonésia jeung Sunda. Sajaba ti éta, kagiatan sapopoéna ngalukis. Putra inohong Nahdatul Ulama Moh. Ilyas Ruhiat. Digedékeun di lingkungan Pasantrén Cipasung Tasikmalaya. Tapi satamatna ti SMA, Acép neruskeun nyuprih élmu ka Fakultas Seni rupa jeung Desain ITB(1980-1987), satuluyna meunang béasiswa ti pamaréntah Italia pikeun ngajeroan seni rupa di Universita Italiana Per Stranieri (1992-1993). Karya-karya Sastra-na winangun sajak sumebar di sababraha kalawarta, saperti Manglé, Horizon, Panji Masyarakat, jsté. Sajak-sajakna dina basa Indonésia diantarana geus dibukukeun dina “Tamparlah Mukaku” (1982), “Aku Kini Do’a” (1984), jeung “Kasidah Sunyi” (1989). Taun 1991 jadi Pinunjul 1 hadiah sajak ti LBSS jeung taun 1993 jadi pinunjul II LBSS. Sajak-sajak basa Sunda-na dibukukeun dina Dayeuh Matapoé (1993).

Rujukan:

• Rosidi, Ajip.dkk. 2000. Ensiklopedi Sunda: Alam, Manusia, Budaya (Termasuk Budaya Cirebon dan Betawi), Jakarta: Pustaka Jaya.