Ali Sadikin (gumelar di Sumedang, 7 Juli 1927 – maot di Singapura, 20 Méi 2008 dina umur 80 taun) nyaéta saurang létnan jéndral KKO-AL (Korps Komando Angkatan Laut) anu ditunjuk ku Présidén Soekarno jadi Gubernur Jakarta dina taun 1966. Saméméhna, manéhna kungsi nyekel kalungguhan minangka Deputi Kepala Staf Angkatan Laut, Menteri Perhubungan Laut Kabinét Kerja, Menteri Koordinator Kompartemen Maritim/Menteri Perhubungan Laut Kabinét Dwikora sarta Kabinét Dwikora anu disampurnakeun di handapeun pupuhu Présidén Soekarno. Ieu jabatan aya patalina jeung pendidikan Ali Sadikin ti Sekolah Tinggi Pelayaran.[1] Ali Sadikin jadi gubernur anu pohara ngarakyat sarta dipikacinta rahayatna. Alatan éta manéhna digero akrab ku nu nyicingan dayeuh Jakarta kalawan panggero Bang Ali samentara pamajikanana, Ny. Nani Sadikin, saurang dokter huntu, digero Mpok Nani. Bang Ali dipilih ku Présidén Soekarno sabab boga sipat heuras, gedé kawani, jeung bisa teges dina unggal kawijakan.[2]

Ali Sadikin
Gubernur Jakarta ka-7
Masa jabatan
1966–1977
Présidén Sukarno
Saméméhna Soemarno Sosroatmodjo
Sanggeusna Tjokropranolo
Menteri Perhubungan Republik Indonesia ka-14
Masa jabatan
13 November 1963 – 28 Maret 1966
Présidén Sukarno
Saméméhna R. Iskandar
Sanggeusna Hidajat Martaatmadja
Ketua Umum PSSI
Masa jabatan
1977–1981
Présidén Soeharto
Saméméhna Moehono
Sanggeusna Sjarnoebi Said
Katerangan lian
Gumelar Ali Sadikin
Kabangsaan Indonésia Indonesia
Pameget/istri Nani Sadikin

Gubernur Jakarta édit

Ali Sadikin nyaéta gubernur anu pohara gedé jasana dina ngembangkeun Jakarta jadi hiji dayeuh metropolitan anu modérn. Dina kapamingpin manéhna Jakarta ngalaman réa parobahan alatan proyék-proyék pangwangunan buah pikiran Bang Ali, kawas Taman Ismail Marzuki, Kebon Sato Ragunan, Proyek Senen, Taman Impian Jaya Ancol, Taman Ria Monas, Taman Ria Rumaja, dayeuh satelit Pluit di Jakarta Kalér, pelestarian budaya Betawi di wewengkon Condet, dll.

Dina salah sahiji buku anu judulna “Bang Ali: Demi Jakarta 1966-1977,”Ali Sadikin ngomong lalu lintas di Jakarta teu paruguh. Lalu lintas bisa kitu sabab nu nyupiran mobil jeung motor sarua teu sopan tepi ka loba nu ngalanggar.

Harita basa ngajabat gubernur, Bang Ali manggihan supir trek ngajalankeun mobil bari ngebut teu paruguh. Nempo kitu, diudag éta supir nepi ka bisa kapanggih Geus dititah eureun, tuluy Bang Ali ngatampiling beungeut éta supir. Kajadian éta nempokeun sakitu tegesna gubernur Jakarta harita dina nyieun kawijakan.

Bang Ali ogé nyetuskeun pesta rahayat saban taundina poé nanjeurna dayeuh Jakarta, 22 Juni. Babarengan jeung éta sagala rupa aspék budaya Betawi dihirupkeun deui, kawas kerak telor, ondel-ondel, lenong sarta topeng Betawi, jst.

Manéhna ogé sempet mikeun perhatian ka kahirupan para artis kolot di dayeuh Jakarta anu waktu éta réa ngamukim di wewengkon Tangki, ku kituna wewengkon kasebut dingaranan Tangkiwood.

Sajaba ti éta, Bang Ali ogé ngayakeun Pekan Raya Jakarta anu waktu éta leuwih dipikawanoh kalawan ngaran Jakarta Fair, minangka sarana hiburan sarta promosi dagang industri barang sarta jasa ti sakumna nagara, komo ogé ti luar nagri. Ali Sadikin junun ngabenerkeun sarana transportasi di Jakarta kalawan ngadatangkeun réa beus kota sarta nata trayékna, sarta ngawangun halteu (tempat nungguan) beus anu merenah.

Dina kapamingpinan Bang Ali, Jakarta sababaraha-kali jadi nu nyalanggarakeun Pekan Olahraga Nasional (PON) anu nganteurkeun kontingén DKI Jakarta jadi jawara umum salila sababaraha-kali.

Salah sahiji kawijakan Bang Ali anu kontrovérsial nyaéta ngembangkeun hiburan peuting kalawan sagala rupa klab peuting, ngizinan diayakeunana perjudian di dayeuh Jakarta kalawan mungut pajegna pikeun pangwangunan dayeuh, sarta ngawangun kompléks Kramat Tunggak minangka lokalisasi palacuran. Dina kapamingpinanana ogé diayakeun pamilihan Abang sarta Noné Jakarta.

Mangsa kalungguhan Ali Sadikin lekasan dina taun 1977, sarta manéhna digantikeun ku Létjén. Tjokropranolo.

Kagiatan saterusna édit

Sanggeus ngandeg ti jabatanna minangka gubernur, Ali Sadikin tetep aktip dina nyumbangkeun pikiran-pikiranna pikeun pangwangunan dayeuh Jakarta sarta nagara Indonésia. Hal ieu mawa ka posisi kritis minangka anggota Petisi 50, hiji jumplukan anu diwangun ti inohong-inohong militer sarta swasta anu kritis ka pamaréntahan Présidén Soeharto.

Maot édit

Bang Ali maot di Singapura, Salasa, 20 Méi 2008. Manéhna ninggalkeun 5 urang anak lalaki sarta pamajikan kaduana anu ditikah sanggeus Nani miheulaan maot. Layonna dikurebkeun di TPU Tanah Kusir.

  1. Okezone. "Kisah Heroik Ali Sadikin, Jenderal Gaya Hollywood yang Maju Perang Paling Depan : Okezone Nasional". https://nasional.okezone.com/ (dalam id-ID). Diakses tanggal 2021-12-16. 
  2. Media, Kompas Cyber. "Mengenal Ali Sadikin, Gubernur Jakarta Berwatak Keras yang Pernah Tampar Sopir Truk Halaman all". KOMPAS.com (dalam Indonesian). Diakses tanggal 2021-12-16.