Bagus Rangin nyaéta tokoh ti Bantarjati, Majalengka. Bagus Rangin diperkirakeun gumelar kira taun 1761. Mangrupa tokoh sajarah jeung pahlawan nu nengtang jeung mingpin palawanan ka Walanda dina Perang Cirebon taun 1805-1812. Ieu Bagus Rangin téh asalna ti Demak, turunan Embah Buyut Sambéng.[1] Lanceukna ngaranna Bagus Rangin, ari adina Buyut Salimar jeung Ki Bagus Serit.[1] Bagus Rangin sadudulur guguru agama ka Sentayem jeung Ama Banten.[1] Bagus Rangin jadi lébér wawanén dina nanjeurkeun bebeneran, nepi ka ku Sultan Cirebon dipercaya jadi kepala daérah (kabagusan) di Jatitujuh tur meunang pangkat Sénapati.[1]

Lantaran nempo rahayat Palimanan katalangsara alatan kapala daérah jeung urang Cina, Bagus Rangin dibaturan ku Bagus Serit, mingpin rahayat Palimanan pikeun baruntak.[1] Kurang leuwih 300 urang rahayat dilatih perang nepi ka bisa niwaskeun Asistén Residén Cirebon dina taun 1806.[1] Gerakan Bagus Rangin dirojong jeung dibarantuan ku sawatara kapala daérah, nyaéta ti Jatitujuh, Rajagaluh, Baruang Kulon, Baruang Wétan, Sumber, Bantarjati, Cikao, Kandanghaur, Kuningan, Linggajati, Luragung, Maja, Sumedang, Karawang, jeung Subang.[1] Gubernur Jénderal Kumpeni A.J. Wiese nugaskeun Nicolaes Engelhard pikeun mingpin pasukan Kumpeni numpes Bagus Rangin sabalad-balad.[1]

  1. a b c d e f g h Ruhaliah (2010). Sajarah Sunda Samemeh Taun 1945. Bandung: Wahana Karya Grafika. p. 143.