Prasasti Huludayeuh
Prasasti Huludayeuh nyaéta salah sahiji prasasti anu dikaluarkeun ku Jayadéwata, Raja Sunda, maké aksara Sunda Kuna anu sarupa jeung prasasti Batutulis.[1]
Perenah édit
Prasasti Huludayeuh aya di tengah pasawahan di kampung Huludayeuh, Désa Cikalahang, Sumber – Cirebon.
Panimuan édit
Prasasti Huludayeuh geus lila dipikanyaho ku nu nyicingan patempatan sabudeureun ieu prasasti tapi pikeun golongan ahli sajarah sarta arkéologi kakara dipikanyaho dina bulan Séptember taun 1991. Prasasti ieu disalabarkeun dina média citak Koran Pikiran Rakyat dina tanggal 11 Séptémber 1991 sarta Koran Kompas dina tanggal 12 Séptémber 1991.
Rupa bahan édit
Prasasti Huludayeuh dipahatkeun dina batu alam. Batu prasasti anu aya ayeuna ukuranana nyaéta luhur 75 cm x rubak 36 cm x kandel 20 cm.
Eusi édit
Prasasti Huludayeuh eusina 11 jajar tulisan nu maké aksara sarta basa Sunda Kuna, tapi hanjakal batu prasasti kasebut mangsa munggaran kapanggih geus henteu gembleng deui alatan sawatara batuna peupeus antukna aksarana milu leungit. Kitu ogé beungeut batuna geus pohara garah sarta tulisanana réa anu milu laas antukna lolobana eusina henteu bisa dipikanyaho. Pikeun hasil samentara, transkripsi anu dipigawé nyaéta kieu:
…………..tra….na….
………..sri mahharaja ratu
haji di pkwan sya sang ratu
dewata ogé/ mangsa sya……..
……..ngretakeun bumi ngaha……
….....lipukkeun/ bumi ngaha……
..ngarah sang di susuk/ lampu…
…….i ngareubhkeun/ ikang….ka…
susi padakah. Ngalasan…
na udugbasu. mipataka…….
is/nikang basa ogé….
Fragmén prasasti kasebut sacara gurat badag nyaritakeun ngeunaan Sri Maharaja Ratu Haji di Pakwan Sya Sang Ratu Déwata anu patali jeung usaha-usahana ngamakmurkeun nagarana.
Tempo ogé édit
Bacaeun édit
- Richadiana Kartakusuma. 1991. Anekaragam Bahasa Prasasti di Jawa Barat pada Abad ke-5 Masehi sampai ke-16 Masehi: Suatu Kajian Tentang Munculnya Bahasa Sunda. Tésis S-2. Fakultas Pasca Sarjana Universitas Indonesia, Jakarta.