Supyan Iskandar
Radén Soepjan Iskandar, dibabarkeun di Sumedang, 23 Jan 1896[1]. Manéhna mangrupa salah sahiji pangarang roman Sunda Dipati Ukur, jeung buku pangajaran dina basa Sunda keur Sakola Dasar.
Taun 1917 tamat ti sakola guru (Kweekschool) di Bandung jeung taun 1922 menang hoofdacte salaku guru bahasa di Jakarta. Taun 1928 tamat ti Militaire Sportschool di Bandung. Pernah jadi guru HIS di sababaraha tempat, jeung di antara taun 1922-1930 jadi guru Normalschool di antarana di Purwakarta. Di dieu manéhna jadi murid kabatinan aliran kasumedangan ti Mohamad Ambri nu dina waktu harita sarua ngajar. Ti Purwakarta, manéhna pindah ka Tasikmalaya jadi guru MULO Pasundan[2].
Nalika zaman Jepang, manéhna jadi pamingpin Séinéndan di Tasikmalaya jeung kapilih keur milu latihan kamilitéran di Bogor. Sangges tamat latihan, manéhna diangkat jadi Daidanco Pembel Tanah Air (PETA) di Garut. Nalika PETA dibubarkeun (1945), manéhna jadi komandan TNI Résimén Priangan Timur di Tasikmalaya, terus diangkat jadi kapala Inspéktorat Angkatan Darat di Yogyakarta (1948).
Balik deui ka Bandung taun 1950 nepi ka pangsiun taun 1953, manéhna jadi pamingpin panata calagara kursus-kursus B-1 Departemén Pendidikan jeung Kabudayaan. Harita manéhna bari nyusun buku pangajaran basa Sunda Piwulang basa keur bahan pangajaran basa Sunda di Sakola dasar. Sangges pangsiun, manéhna aktif dipakumpulan Daya Sunda. Taun 1956 babarengan Éma Bratakusuma, Otong Kosasih, jeung Sutisna Sendjaja, nerbitkeun mingguan basa Sunda Kalawarta Kujang. Babarengan jeung Rohéndi Sumardinata dina taun 1959 ngarang roman Sunda Dipati Ukur.
Dina taun 1961 nepi ka tepung jeung ajalna, manéhna jadi pangurus kumpulan pamuda Kujang Putra. Manéhna di kuburkeun di pamakaman Bojongjati, Sumedang. Pernah jadi anggota DPRD TK. I Jawa Barat dina taun 1957, terus ménta euren alatan aya pagawé nu ménta tanda tangan perjalanan dinas fiktif. Tulisan-tulisana dina Kalawarta Kujang, salianti nengetan situasi masyarakat harita, ogé loba ngandung atikan piken kaluhuran budi manusa.
Rujukan édit
- ↑ Rosidi, Ajip, 1938-; Pustaka Jaya (Firm) (2000). Ensiklopedi Sunda : alam, manusia, dan budaya, termasuk budaya Cirebon dan Betawi (Cet. 1 ed.). [Jakarta]: Pustaka Jaya. ISBN 979-419-259-7. OCLC 45463431.
- ↑ Rosidi, Ajip, 1938-; Pustaka Jaya (Firm) (2000). Ensiklopedi Sunda : alam, manusia, dan budaya, termasuk budaya Cirebon dan Betawi (Cet. 1 ed.). [Jakarta]: Pustaka Jaya. ISBN 979-419-259-7. OCLC 45463431.