Gedong De Majéstic
Gedong De Majéstic nyaéta bioskop anu boga nilai sajarah, kaasup bioskop anu kahiji di Bandung[1]. Gedong éta kaasup wangunan cagar budaya golongan A dumasar kana Perda Kota Bandung No. 19/2009.[2]
Sajarah
éditDina zaman Walanda, bioskop ieu janten salah sahiji tempat anu husus pikeun urang Eropa waé.[3]
Bioskop ieu diwangun ku Technisch Bureau Soenda dina taun 1920. Pangwangunan gedong réngsé dina taun 1922. Baheula kasohor disebat bioskop Concordia. Gaya arsitéktur Bioskop Majestic nyaéta campuran teknik konstruksi modern ti barat jeung seni ukir tradisional ti Indonesia. Campuran dua gaya éta disebat gaya arsitektur Indo-Europeeschen Architectuur Stijl.[4]
Bioskop éta masih kénéh dipaké nepi ka patengahan taun 1980-an.[1] Saprak taun 2000, gedong bioskop dijadikeun Sekretariat Pusat Kebudayaan Asia Afrika/Asia-Africa Cultural Centre (AACC).[4] Dina taun 2000-an, Bioskop Majestic kungsi dipaké pikeun gedong pagelaran jeung pusat budaya masarakat Bandung.[5] Ku sabab aya bioskop anu anyar, De Majéstic tutup jeung teu kaurus. Dina taun 2010, dirombak gedongna.[1]
Arsitéktur
éditBioskop ieu janten bagéan ti Sociëteit Concordia, anu ngurusna nyaéta Elita Concern anu dipiboga ku raja bioskop F.A. Busse. Di daérah Braga, gedong ieu katingali nonjol ku sabab wujudna anu silinder dina hareupeun gedong, sarua jiga kaléng biskuit atawa sok disebat blikken trammel. Anu janten ciri khasna salian ti éta nyaéta aya hiasan sirah Batara Kala anu aya dina dinding hareup dina luhur wangunan. Dina jerona, bioskop ieu dilengkepan ku balkon, meja jeung kursi ditata jiga di réstoran.[6]
Dina mimiti dibuka, bioskop Majestic kungsi dikelola ku arsiték nu geus boga pangalaman anu ngaranna Henri Wallig. Saméméh ngurus bioskop, anjeunna ngurus Tuschinski Theatre di Amsterdam.[5]
Parobahan ngaran
éditMimitina dingaranan Bioskop Concordia. Dina taun 1924, gedong anu wujudna unik ieu diwangun ku Biro Arsiték Soenda dumasar kana rancangan Wolff Schoemaker. Teras dina taun 1937, robah ngaran janten Majestic Theatre.[7]
Kaayaan bioskop
éditDina kaping 31 Desember taun 1926, bioskop ieu muter Loetoeng Kasaroeng anu dibuat ku NV Java Film Company. Film ieu aya waé di bioskop nepi ka 6 Januari 1927. Film éta lokasi syutingna aya di sabudeureun Bandung jeung Padalarang. Anu merankeun film ieu nyaéta pribumi anu kaasup golongan priyayi.[8]
Film anu basa éta mindeng diputer téh nyaéta film bisu. Saméméh film diputer, petugas bioskop ngabagikeun selebaran anu nyaritakeun alur film.Baheulana tempat éta téh kaasup tempat elit. Anu nongton kudu maké pakéan rapi, tempat pikeun awéwé jeung lalaki kapisah.[1]
Ku sabab mindeng muter film-film anu diproduksi ku Metro Goldwyn Meyer, bioskop Concordia sok disebat Metro House.[6]
Korsi pikeun panongton bioskop dijieun tingkat, sarua jiga bioskop ayeuna. Sanajan kitu, aya bédana, korsi anu panghandapna pikeun panongton kelas bawah jeung harga tiketna mirah, korsi anu pangluhurna pikeun panongton kelas élit jeung harga tiketna mahal. Film diputer dina tabuh 19.30 nepi ka 21.00. Saméméhna, bioskop geus diramékeun ku pagelaran orkes alit anu nampilkeun alat-alat musik sapertos biola, gitar, chelo jeung tambur. Biasana, musikna dimaénkeun méh serasi jeung film anu badé diputer. Film anu diputer teu béntés kawas film anu diputer dina zaman ayeuna. Proyektor nu aya ngan saukur dipaké pikeun muter hiji reel film, nyaéta rol film anu panjangna 300 m salila 15 menit. Pikeun muter film salila hiji satengah jam, kudu aya jeda lima kali pikeun ngaganti reel. Supados teu bosen nungguan film diputer, biasana sok aya iklan anu ditampilkeun.[8]
Rujukan
édit- ↑ a b c d Al Adabiyah, Nurfaizah. "De Majestic, Sejarah Dunia Hiburan Kota Bandung yang Sedikit Terlupakan". Diakses tanggal 25 November 2023.
- ↑ "Gedung Majestic, Dulu Tempat Kongko Orang Belanda, Beberapa Kali Ganti Nama, Saksi Bisu Tragedi AACC". Tribunjabar.id (dalam id-ID). Diakses tanggal 2023-12-02.
- ↑ Hutagalung, Ridwan; Nugraha, Taufanny (2014). Braga Jantung Parijs van Java. Bandung: Ka Bandung. p. 65. ISBN 978-979-18671-1-5.
- ↑ a b Lastriana, Nova. "HJKB 211 TAHUN: INI SEJUMLAH BIOSKOP YANG MENYERTAI SEJARAH KOTA BANDUNG". Diakses tanggal 25 November 2023. Archived 25 Nopémber 2023 di Wayback Machine
- ↑ a b Hutagalung, Ridwan; Nugraha, Taufanny (2014). Braga Jantung Parijs van Java. Bandung: Ka Bandung. pp. 65–66. ISBN 978-979-18671-1-5.
- ↑ a b Akhmad, Irwan. "Bioskop Majestic, Hanya untuk Kalangan Elite Eropa". Diakses tanggal 25 November 2023. Archived 25 Nopémber 2023 di Wayback Machine
- ↑ Hutagalung, Ridwan; Nugraha, Taufanny (2014). Braga Jantung Parijs van Java. Bandung: Ka Bandung. p. 63. ISBN 978-979-18671-1-5.
- ↑ a b Utama, Arya Vidya. "Cerita Pasang Surutnya Bioskop Majestic Bandung". Diakses tanggal 25 November 2023.