Nyacah Gancang

Nyacah Gancang (Basa Inggris: quick count) nyaéta hiji métode pikeun ngira-ngira hasil pamilihan umum (pamilu). Carana mah ukur ngitung hasil ahir sora di TPS (Tempat Pemungutan Suara) nu dijadikeun conto (sampel). Sangkan bisa ngawakilan sakabéh TPS nu aya, TPS conto dipilih maké métode cuplik acak statistik.

Ngitungna bisa gancang sabab teu jiga cara ngitung lembaga pamilihan resmi nagara (KPU/KPUD/KIP) nu bertingkat, Nyacah Gancang mah, salian teu sakabéh TPS diitung, langsung ngitung saréngsé TPS ngitung sora.

Ku kamajuan téhnologi, kiwari mun maké Nyacah Gancang hasil pamilihan bisa kanyahoan sababara jam sanggeus TPS tutup.

Kagunaan

Salah sahiji kagunaan nyacah gancang téh bisa dijadikeun kontrol gawé lembaga pamilihan resmi. Ceuk sajarahna gé, nyacah gancang lahir sabab ayana kateupercayaan rahayat ka nagara.

Dina pamilihan présidén Filipina taun 1986, Presidén petahana Ferdinand Marcos ngaklaim geus meunang. Aya hiji lembaga swadaya masarakat ngaranna Namfrel (National Citizens' Movement for Free Elections) nu bisa ngunjukkeun hasil itungan nu beda. Nyacah gancang Namfrel, nu disebut PVT (Basa Inggris: Parallel Vote Tabulation), mah mangmeunangkeun lawan Marcos, Corazon Aquino. Rahayat Filipina leuwih percaya kana hasil itungan Namfrel.

Di Indonesia

Di Indonésia, nyacah gancang geus galib dilakukan loba pamilihan. Boh ditingkat nasional (pamilihan anggota législatip jeung presidén), ogé di tingkat daérah (pamilihan gubernur, bupati atawa wali kota).

Lembaga surpéy nu munggaran ngalakukeun nyacah gancang di Indonésia nyaéta LP3ES (Lembaga Penelitian Pendidikan Penerapan Ekonomi dan Sosial) nu dumasar kana pangakuan salah saurang mantan ketuana, Roestam Éfféndi geus ngalakukeun di taun 1997.

Lembaga Surpéy nu Kungsi Nyacah Gancang

Ieu daftar lembaga surpéy nu kungsi ngalakukeun di Indonésia:

• CSIS
• Cyrus Network
• GRP (Grup Riset Potensial)
• Indikator Politik Indonésia
• Indobarometer
• IRC (Indonésia Reséarch Center)
• JSI (Jaringan Suara Indonésia)
• Litbang Kompas
• LP3ES (Lembaga Penelitian Pendidikan Penerapan Ekonomi dan Sosial)
• LSN (Lembaga Survei Nasional)
• LSI (Lembaga Survei Indonésia)
• LSI (Lingkaran Survei Indonésia)
• Median
• Polmark
• Poltracking
• Populi Center
• Puskaptis
• RRI (Radio Republik Indonésia)
• SMRC (Saiful Mujani Reséarch & Consulting)