Aarcaan nyaéta kaulinan barudak, nurutan atawa niru-niru patung, biasa dilakukeun di buruan imah atawa di lapang, ieu kaulinan téh aya na di Cigoléndang, Malangbong, Kabupatén Garut.[1] Nu biasa ngalakukeun kaulinan ieu nyaéta budak awéwé nu umur na 6-10 taun tur jumlahna 6-14 urang.[1] Dibagi jadi dua kelompok, misalna kelompok A jeung kelompok B.[1] Anggota masing-masing kelompok jumlah na sarua. Salah saurang jadi pamingpin anu dipilih ku anggota kelompokna.[1] Cara milihna nyaéta dikocok.[1] Kelompok nu meunang tuluy asup ka jero opat pétak persegi panjang nu ukuranna 6x3m, sedengkeun nu éléh bagéan jaga di luarna.[1] Pamingpin kelompok anu meunang kocokan atawa undian (A), asup dituturkeun anggota kelompok na nu baris ditukangeunana.[1] Kelompok lawanna (B) dibagi dua, nu kahiji aya dua urang (B1 jeung B2) sedengkeun nu lianna (B3, B4, jeung B5) siap ngaheureuyan atawa ngagoda A1, A2, A3, A4, jeung A5, éta gé lamun geus lolos ti B1, B2.[1]

Cara maénna nyaéta: A1 kudu bisa ngaliwatan logodoran leungeun B1 jeung B2 nu cingogo.[1] Lamun A1 ngajleng, B1 jeung B2 kudu usaha pikeun noél suku atawa awak A1, lamun beunang hartina A1 kudu balikan deui nganjleng na jeung mundur ka tukangeun A5 pikeun ngadagoan giliran, tapi lamun teu beunang hartina manéhna lolos jeung boga kawasa nangtung di tengah.[1] A1 kudu nangtung jiga patung (arca), nahan godaan B3 jeung nu lian.[1] Lamun seuri atawa oyag saeutik hungkul, A1 kudu balik deui ka tukangeun A5 tuluy diganti ku A2, kitu ogé lamun A2 seuri atawa oyag saeutik kudu diganti ku A3 jeung saterusna.[1] Lamun kelompok A meunang jadi aarcaan kalayan teu kagoda ku kelompok B, hartina kelompok A meunang.[1]

Rujukan édit

  1. a b c d e f g h i j k l m Rosidi, Ajip (2000). Ensiklopedia Sunda. Indonesia: Pustaka Jaya. p. 3. ISBN 9794192597.