BRTI

Badan Regulasi Télékomunikasi Indonésia, nu disingket BRTI, nyaéta hiji lembaga anu boga fungsi salaku badan regulator telekomunikasi di Indonésia.

Logo BRTI

Kasang Tukang

Telekomunikasi miboga sipat anu robah teterusan, ampir heneuweuh tungtungna sarta sanggup ngarobah tatanan di muka bumi, ngarobah pola pikir manusa, mangaruhan laku-lampah sarta kahirupan umat manusa. Télékomunikasi ayeuna geus jadi kaperluan hirup anu disajajarkeun jeung hak asasi manusa.

Tujuh taun ka tukang télékomunikasi Indonésia asup kana lambaran sajarah anyar. Ngaliwatan Undang-undang Nomer 36/1999 ngeunaan Télékomunikasi, sektor ieu resmi ngaleupaskeun hak istiméwa monopolina pikeun sagancangna ngalakukeun transisi ka jaman kompetisi. Para pamaén anyar ogé diondang pikeun jadi operator jaringan atawa jasa di sektor ieu. Réa golongan bungah ngabagéakeun lahirna undang-undang télékomunikasi kasebut. Sumawona taun éta lahir ogé Undang-undang Nomer 5/1999 ngeunaan Larangan prakték Monopoli sarta Persaingan Usaha Henteu Sehat.

Tapi tétéla kompetisi télékomunikasi jauh jeung nu dipikaharep. Mecenghul pihak-pihak nu ménta diwangun badan regulasi indepénden. Hiji Badan Regulasi Mandiri (IRB-Independent Regulatory Body) anu diharepkeun bisa nangtayungan kapentingan publik (pamaké télékomunikasi) sarta ngarojong jeung nangtayungan kompetisi dina usaha télékomunikasi antukna jadi séhat, efisien sarta narik para invéstor. Tanggal 11 Juli 2003 ahirna pamaréntah ngaluarkeun Kaputusan Menteri Perhubungan No. 31/2003 ngeunaan ditetepkeunana Badan Regulasi Télékomunikasi Indonésia (BRTI). BRTI nyaéta tarjamahan tina IRB vérsi pamaréntah anu diharepkeun jadi hiji Badan Régulasi anu idéal.

Koméntar satuluyna anu réa mecenghul nyaéta pamaréntah dianggap satengah haté alatan salah sahiji personel BRTI sakaligus jadi Pupuhu nyaéta Dirjen Postel. Kepmenhub No. 31/2003 kasebut geus dirobah ku Aturan Menteri Kominfo No. 25/Per/M.Kominfo/11/2005 ngeunaan Parobahan Kahiji Kaputusan Menteri Perhubungan No. KM.31 taun 2003 ngeunaan Ditetepkeunana Badan Regulasi Télékomunikasi Indonésia] ogé henteu méré wewenang salaku éksékutor ka BRTI. Hal kasebut dituliskeun dina Kaputusan Menteri Perhubungan No. 67 taun 2003 ngeunaan Tata Hubungan Gawé antara Departemen Perhubungan jeung Badan Regulasi Télékomunikasi Indonésia.

Tapi leupas tina polemik di luhur, geus jadi pancén babarengan pikeun ngadorong sangkan BRTI anu geus kawangun ieu bisa digawé maksimal antukna bisa mecut mekarna industri télékomunikasi ngaliwatan iklim kompetisi, ngaronjatkeun éfisiénsi sarta nangtayungan kapentingan publik sacara de facto jeung de jure.

Fungsi jeung Kawenang

Luyu jeung KM. 31/2003

• Nyusun sarta netepkeun katangtuan pikeun ngajalankeun usaha widang télékomunikasi, nyaéta:

1. Idin ngajalankeun jaringan jeung jasa télékomunikasi;
2. Standar unjuk gawé palaksanaan télékomunikasi;
3. Standar kualitas layanan;
4. Béa interkonéksi;
5. Standar alat télékomunikasi.

• Ngawaskeun pausahaan widang télékomunikasi, nyaéta:

1. Unjuk gawé panyadiaan jasa jeung jaringan télékomunikasi;
2. Pasaingan usaha;
3. Pamakéan alat télékomunikasi.

• Nadalikeun jalanna usaha widang télékomunikasi, nyaéta:

1. Méréskeun pacogrégan antar nu ngayakeun jaringan télékomunikasi sarta nu ngayakeun jasa télékomunikasi;
2. Pamakéan alat télékomunikasi;
3. Panerapan standar kualitas layanan.

Luyu jeung KM. 67/2003

Fungsi Nyieun Aturan

• Nyusun sarta netepkeun katangtuan ngeunaan idin jaringan jeung jasa télékomunikasi anu luyu jeung Kawijakan Mentri.
• Nyusun sarta netepkeun katangtuan ngeunaan standar unjuk gawé palaksanaan pamakéan jaringan jeung jasa télékomunikasi.
• Nyusun sarta netepkeun katangtuan ngeunaan waragad interkonéksi.
• Nyusun sarta netepkeun katangtuan ngeunaan standardisasi alat nu dipaké dina télékomunikasi.

Fungsi Pangawasan

• Ngawaskuen unjuk gawé panyadiaan jasa jeung jaringan télékomunikasi.
• Ngawaskeun pasaingan usaha panyadiaan jasa jeung jaringan télékomunikasi.
• Ngawaskeun pamakéan pakakas nu dipaké dina panyadiaan jasa jeung jaringan télékomunikasi.

Fungsi Kadali

• Fasilitasi méréskeun pacéngkadan.
• Ngawaskeun panerapan standar kualitas layanan.

Anggota

Période 2003-2005

1. Djamhari Sirat (Dirjén Postel) salaku pupuhu
2. Koesmarihati
3. Soetjipto
4. Hery Nugroho
5. Suryadi Azis

Période 2006-2008

Anggota BRTI période 2006-2008 dilantik ku Menkominfo Sofyan Djalil tanggal 16 Januari 2006.

1. Basuki Yusuf Iskandar (Dirjén Postel) salaku pupuhu
2. Ahmad M. Ramli
3. Koesmarihati
4. Bambang P. Adiwiyoto
5. Heru Sutadi
6. Kamilov Sagala
7. Hery Nugroho

Dumasar kana Kaputusan Mentri Kominfo Nomer 433/KPE/M.Kominfo/2007, tanggal 8 Oktober 2007, Anggota BRTI nu ngawakilan pamaréntah nyaéta Prof. Dr. Ahmad Ramli anu ayeuna jadi Kepala Badan Pembinaan Hukum Nasional anu geus dibébastugaskan tina jabatanana salaku staf Ahli Widang Hukum Menkominfo, diganti ku Prof Abdullah Alkaff, M. Sc., Ph.D. Ayeuna Prof. Alkaff nyekel kalungguhan salaku staf Husus Menkominfo.

Tempo ogé

• Ditjen Postel

Tumbu kaluar

• (id) Loka resmi BRTI Archived 2016-10-13 di Wayback Machine