Indonesia Internet Exchange
Indonésia Internet Exchange (IIX) mangrupa tempat nyambungna sagala rupa Internet Services Provider (ISP), panyadia jasa internet di Indonésia, upamana waé CBN, 3G-net, Indosat M2, Telkomnet Instant sarta nu lian-lianna. Sacara harfiah exchange hartina tutukeuran sedengkeun internet nyaéta kapondokan tina Interconnection Networking. Ku ayana IIX, sambungan internet anu aya di Indonésia henteu kudu putar-puter ngaliwatan jalan anu aya di luar nagri heula tuluy kakara balik deui ka Indonésia. Konsép IIX, nu ngagabungkeun jalan rupa-rupa ISP kana hiji wadah, mangrupa konsép anu munggaran di dunya
IIX dijieun ku Asosiasi Pengusaha Jasa Internet Indonésia (APJII). Tujuan IIX nyaéta nyieun jaringan interkonéksi nasional anu mibanda pangabisa sarta fasilitas anu luyu jeung kaperluan nu aya, pikeun dipaké ku saban ISP anu mibanda idin di Indonésia. ISP anu nyambung ka IIX tanpa dipénta bayaran pikeun rubakpita, ngan dipénta waragad pikeun sambungan fisik sepeti serat optik atawa leased line. Waragad ieu cukup murah pikeun ISP anu aya di Jakarta tapi hanjakal mahal pikeun ISP anu aya di luar Jakarta, sumawona di luar Jawa, alatan waragad sambungan fisikna waé jauh leuwih mahal batan sambungan internasional kaasup kapasitas rubakpita nu langsung ngaliwatan satelit ka luar nagri.
IIX jadi hiji jawaban pikeun pasualan kurangna infrastruktur pikeun muatan lokal. Ku ayana IIX mangka sambungan internét di Indonésia jadi leuwih murah. Indonésia Internet Exchange ngantor di Gedong Cyber Lanté 11, Jl. Kuningan Barat 8, Jakarta 12710.