Métamorfosis

Métamorfosis hartina prosés biologis kamekaran pangawakan hiji sato sanggeus megar atawa borojol, ngawengku parobahan bentuk atawa struktur alatan diferensiasi tumuwuhna sél.

Hileud Pieris rapae

Kepongpong Pieris rapae

Hambalan

Métamorfosis biasana lumangsung ngaliwatan sababaraha hambalan, dimimitian ku larva atawa hileud, asup kana kepongpong, terus sawawa.

Hambalan "can sawawa" spésiés-spésiés nu ngalaman métamorfosis ilaharna disebut larva, tapi ari dina insékta nu métamorfosisna kompléks, sebutan larva téh nujul ka hambalan kahiji wungkul, nu salajengna robah jadi sababaraha bentuk séjén, saméméh bener-bener sawawa.

Métamorfosis insékta

Sakabéh insékta Apterygota jeung lolobana Exopterygota kaasup hémimétabolik, sedengkeun Endopterygota mah kabéhanana holométabolik. Najan kitu, aya sababaraha Exopterygota—kayaning Thysanoptera, Aleyrodidae, jeung Coccoidea jalu—ngalaman métamorfosis nu sarupa jeung nu hémimétabolik.

Pangaturan hormonal

Métamorfosis jeung tumuwuhna insékta diatur ku hormon nu dijieun ku kelenjar éndokrin di bagian hareup awakna.

Sababaraha sél uteuk insékta nyékrésikeun hormon nu ngagiatkeun kelenjar toraks, nu ngaluarkeun hormon kadua nu mangrupa stéroid (ékdisona), nu nginduksi métamorfosis. Corpora allata ngahasilkeun hormon juvenil, nu nyegah mekarna ciri kasawawaan, sangkan bisa neruskeun ékdisis. Ku kituna, insékta kakara ngalaman métamorfosis mun produksi hormon juvenilna eureun.

Baca ogé

• Holométabolisme
• Hémimétabolisme
• Amétabolisme
• Hipermétamorfosis
• Morfogenesis

Rujukan

• Metamorphosis, Wikipédia édisi basa Inggris (31 Agustus 2006)
• Davies, R.G., Outlines of Entomology, Chapman and Hall: chapter 3

Tumbu kaluar

• Description of metamorphosis and its different forms
• Info on butterflies and butterfly metamorphosis
• Info on insect hormones Archived 2010-01-03 di Wayback Machine