Pacici-cici Putri
Pacici-cici Putri nyaéta kaulinan jeung kakawihan barudak anu ngagunakeun rumpaka lagu Pacici-cici Putri.[1] Ieu kaulinan dilaksanakeun dina waktu nyalsé, biasana soré antawis tabuh opat dugi ka tabuh lima.[1] Tempatna di buruan imah.[1] Diulinkeun ku barudak awéwé.[1] Rumpakana nyaéta :
pacici-cici putri,
serélék kembang celempung,
ali-ali pamadatan,
goréng adat tigurubras,
kalau mau kembang apa?
Tuluy si budak anu ditanya ngajawab :"Kembang pacar".[1] Tuluy barudak nu séjén ngawih rampak :
Ma nona ma nona si... (ngaran budak éta) hayang kembang pacar kabogohna tukang nyacar
Kakawihan éta dipingpin ku barudak awéwé anu jadi gegedug (pamingpin).[1] Budak awéwé anu ditanyaan nyaéta anu éléh basa kocokan hompimpah dilaksanakeun.[1] Budak anu éléh éta ngabébérkeun ramo-ramo leungeun kéncana, lima ramo éta digunakeun pikeun nangtukeun engang kakawihan, nyaéta "pa" tina "kembang apa".[1] Ramo anu bener dina suku kata "pa", kudu ditilepkeun ka jero.[1] Basa nyebutkeun "kabogohna tukang nyacar", kabéh barudak seuri saolah-olah nyirikan sabab budak kénéh geus boga kabogoh.[1] Salajengna, kabéh ramo leungeun kénca barudak anu ulin meunang giliran siga budak anu éléh bieu.[1] Saha anu ramona bener dina suku kata "pa" (dina "apa"), budak éta kudu ngajawab.[1] Jawabanna kudu béda jeung jawaban anu saacana.[1]