Patelak Drake-Kendrick Lamar

Ti mimiti dékade 2010an, Rapper asal Kanada Drake sareng rapper asal Amérika Kendrick Lamar parantos kalibet dina patelak rap. Sanajan kungsi ngandeg ti taun 2015, duanana balik deui paséa pas ahir sasih Maret 2024 saatos perdana lagu "Like That" karya Future, Metro Boomin sareng Lamar.

Drake (kénca) sareng Kendrick Lamar (katuhu)

Taun 2011, maranéhanana ngayakeun kolaborasi dina album Drake, Take Care, sareng sataun saterusna dina albumna Lamar, Good Kid, M.A.A.D. City. Dina taun 2013, Lamar nyindiran sababaraha rapper kaasup Drake dina lagu "Control" karya Big Sean. Anjeunna nétélakeun yén lirikna dimaksudkeun pikeun ditempo salaku "persaingan ramah".

Dina sasih Oktober 2023, J. Cole nyebutkeun dina lagu "First Person Shooter" tina albumna Drake For All the Dogs yén anjeunna, Drake, sareng Lamar téh 'tilu besarna genre hip hop' (Big Three). Dina Maret 2024, konplik ngahaneutan deui nalika Lamar nolak ayana istilah "Big Three" sakaligus nga-diss duanana dina lagu "Like That". Cole tuluy ngabales Lamar dina lagu diss "7 Minute Drill". Tapi, Cole nuhunkeun hampura sareng ngahapus lagu éta tina jasa streaming.

Drake teras ngarilis lagu "Push Ups" sareng "Taylor Made Freestyle" dina sasih April. "Taylor Made Freestyle" téh ngandung vokal Tupac Shakur sareng Snoop Dogg anu dijieun ku kecerdasan buatan (AI). Pihakna Tupac teu sapuk ku pamakéan sorana Tupac dina laguna jeung ngacem Drake bakal dibawa ka méja héjo. Kumargi éta, lagu ieu dipupus ti média sosial. Salaku réspon keur Drake, Lamar ngarilis lagu "Euphoria" dina 30 April sareng "6:16 di LA" dina 3 Mei.

Drake ngabales ku lagu "Family Matters" dina dinten éta. Dina laguna, Drake nuduh Lamar yén Lamar teh palaku KDRT sareng nyatakeun yén salah sahiji budakna Lamar téh sabenerna budak manajerna Dave Free. Dua puluh menit sanggeus eta, Lamar ngarilis "Meet the Grahams", nuduh Drake salaku prédator séksual, perdagangan séks, sareng gaduh budak rusiah. Lamar teras ngaluarkeun lagu "Not Like Us" pas sontenna, tuluy nuduh Drake téh saurang pédofil sareng ngabohong ngeunaan kulawarga Lamar. Dina 5 Méi, Drake ngabales ku laguna "The Heart Part 6", nolak tuduhan Lamar sarta ngaku timnya masihan Lamar informasi palsu ngeunaan anak rusiah éta.