Prebu Maharaja nyaéta raja Sunda anu maréntah salila tujuh taun (1350-1357). Dina taun 1357, bareng jeung anak nu cikalna nyaéta Puteri Dyah Pitaloka atawa Citraresmi ogé para ponggawana indit ka Karajaan Majapait pikeun ngawinkeun Puteri Dyah Pitaloka jeung Raja Majapait nyaéta Hayam Wuruk, anu saméméhna geus ngirimkeun lamaranana ka Karajaan Sunda. Ku sabab tipu muslihat Patih Gajahmada, éta paniatan anu hadé téh barobah jadi peperangan anu kacida rongkahna di Palagan Bubat, atawa dipikawanoh salaku Pabubat atawa Pasundabubat (nurutkeun Pararaton). Dumasar kana naskah Pangéran Wangsakerta, Prebu Maharaja atawa nu biasa disebut Prabhu Linggabuanawisésa dipikawanoh ku sebutan Sang Mokténg Bubat (Yang mendiang di Bubat).[1]

Paristiwa Bubat ngabalukarkeun Prebu Maharaja gugur salaku pahlawan anu mertahankeun kamerdékaan jeung harga diri nepi ka dipikawanoh salaku Prebu Wangi, nyaéta ngaran nu seungit ku sabab kasinatriaanana. Sanggeus Raja Linggabuana gugur di Palagan Bubat, pamaréntahan Karajaan Sunda nu sakuduna digantikeun ku anak bungsuna nyéta Nisakala Wastu Kancana nu harita hirup kénéh ku sabab teu ngilu ka Palagan Bubat, digantikeun heula ku adina Prabu Maharaja nu ngaranna Rahyang Bunisora Suradipati salaku wakil nagara salila 14 taun (1357-1371), nu engkéna lamun Niskala Wastu Kancana geus gedé miboga hak kana tahta karajaanana.[1]

RujukanÉdit

  1. a b Rosidi, Ajip, 1938-; Pustaka Jaya (Firm) (2000). Ensiklopedi Sunda : alam, manusia, dan budaya, termasuk budaya Cirebon dan Betawi (Cet. 1 ed.). [Jakarta]: Pustaka Jaya. ISBN 9794192597. OCLC 45463431.