Standar
telepon mobil jeung data
Kulawarga GSM / UMTS
2G
3G
Pre-4G
Kulawarga cdmaOne / CDMA2000
2G
3G
Pre-4G
Tehnologi sejen
0G
1G
2G
Pre-4G
Pita frékuénsi

AMPS, singketan tina kecap-kecap basa Inggris Advanced Mobile Phone System nyaéta standar sistem telepon mobil analog anu dimekarkeun ku Bell Labs, sarta sacara resmi diwanohkeun di buana Amérika dina taun 1983[1][2].

Téknologi édit

AMPS mangrupa téknologi sélulér generasi munggaran (1G) nu ngagunakeun frékuénsi atawa kanal nu béda pikeun tiap panelepon (tempo FDMA). Temahna, ieu téknologi merlukeun rubakpita nu lega. Sacara umum, AMPS sarupa pisan jeung "0G" nu leuwih ti heula, ngan baé ngagunakeun daya komputasi nu leuwih loba pikeun milih frékuénsi, pikeun hand off ka nomer-nomer sambungan PSTN, sarta pikeun ngatur tagihan jeung call setup.

Nu ngabédakeun AMPS ti téknologi lianna nu leuwih kolot nyaéta ayana "back end" call setup functionality. Dina AMPS, puseur-puseur sél bisa sacara fléksibel méré kanal kana handset dumasar kana kuatna sinyal nu dipancarkeun ku handset, temahna frékuénsi nu sarua bisa digunakeun deui di patempatan lianna tanpa ngakibatkeun gangguan. Tumerapna, AMPS bisa ngaladénan réa nomer langganan dina wilayah tinangtu. AMPS jadi panaratas istilah "sélulér" lantaran ieu téknologi nu munggaran ngagunakeun sél-sél héksagonal nu leutik dina sahiji sistem.[3][4]

Aya sawatara kakurang AMPS lamun dibandingkeun jeung téknologi digital kiwari. Lantaran ieu téknologi sifatna analog, AMPS uduh pisan ku gangguan statik jeung nois sarta teu boga panyalindungan tina panyadap (basa Indonésia: penyadap) sora nu ngagunakeun scanner. Dina taun 1990-an, "cloning" mangrupa panyakit épidemik nu ngarugikeun industri télékomunikasi trilyunan dolar. Panyadap nu teu jujur ieu kalayan ngagunakeun alat husus bisa nyadap nomer seri éléktronik (ESN) dina jero handset. ESN téh mangrupa pakét data nu dikirim ku handset ka koropak langganan dina sistem sélulér nu dimaksudkeun pikeun ngumpulkeun data tagihan. Sistem sélulér satuluyna ngabeunangkeun atawa ngalarang pamaké handset pikeun nelepon atawa ngagunakeun fitur tinangtu dumasar kana koropak langganan kasebut. Lamun ESN disadap, mangka nomer kasebut bisa ditiron (di-cloning) ku telepon lianna sarta digunakeun di daérah lian pikeun nelepon tanpa mayar. Sanajan cloning masih bisa dilakukeun kiwari dina jaman téknologi digital, saeutik pisan untungna antukna masalah ieu leungit sorangan. Kiwari AMPS geus kasilih ku standar digital nu leuwih anyar saperti D-AMPS, GSM, jeung CDMA2000 nu nawarkeun kaamanan nu leuwih hadé sarta kamampuh nu leuwih gedé.

Pita frékuénsi édit

Layanan télékomunikasi sélulér AMPS dijalankeun dina pita frékuénsi 800 MHz. Anatomi unggal kanal diwangun ku dua frékuénsi, nyaéta frékuénsi downlink ti base station jeung frékuénsi uplink ti handset. 416 frékuénsi uplink dina pita 824–849 MHz digunakeun pikeun ngirimkeun sora ti handset ka base station, papasangan jeung 416 frékuénsi downlink dina pita 869–894 MHz pikeun ngirimkeun sora ti base stations ka handset. Unggal situs sél (base station) baris ngagunakeun sabagéan tina kanal-kanal ieu, sarta kudu béda jeung situs sél sabudeureunana pikeun nyingkahan gangguan (interférensi). Hal ieu anu ngabalukarkeun jadi kurangna jumlah kanal dina unggal situs sél. Unggal kanal AMPS rubakna 30 kHz.

AMPS analog diganti ku nu digital édit

Lantaran téknologi AMPS téh standarna analog, mangka ieu téknologi henteu éfisien dina ngagunakeun spéktrum frékuénsi. Kiwari, ampir kabéh pausahaan télékomunikasi pamaké AMPS geus ngaganti téknologina ku nu boga standar-standar digital saperti CDMA2000 atawa GSM. Téknologi digital saperti GSM jeung CDMA2000 nawarkeun kamampuh ngirimkeun réa sora dina hiji kanal jeung fitur mutahir saperti pangiriman pesen dua arah (two-way text messaging) jeung layanan data. Bell Mobility jeung Telus Mobility di Kanada, anu can ngabongkar jaringan AMPS bogana nepi ka bulan Pebruari 2008 téh.[1]. OnStar masih gumantung pisan kana layanan AMPS di Amérika Kalér. Sanajan kitu, ieu pausahaan kiwari keur migrasi kana sistem digital. ADT Security Services kiwari malah ménta FCC, regulator télékomunikasi di Amérika Sarikat, sangkan manjangkeun wates waktu pikeun nutup izin AMPS lantaran loba pisan sistem alarem bogana nu ngagunakeun téknologi analog pikeun komunikasi jeung puseur kadalina.[5]

Rujukan édit

  1. Private Line Archived 2012-06-10 di Wayback Machine.
  2. MilestonesPast Archived 2011-10-06 di Wayback Machine.
  3. W. Rae Young, "AMPS: Introduction, Background, and Objectives", Bell System Technical Journal, vol. 58, 1, pages 1-14, January 1979. (Note: Young was the Bell Labs engineer who invented the hexagonal cell concept.)
  4. Z. C. Fluhr and Philip T. Porter, "AMPS: Control Architecture", Bell System Technical Journal, vol. 58, 1, pages 1-14, January 1979. (Note: Porter was the Bell Labs engineer who proposed that the cell towers be at the corners of the hexagons rather than the centers and have directional antennas that would transmit/receive in 3 directions into 3 adjacent hexagon cells.)
  5. ITWorld Archived 2006-10-16 di Wayback Machine.