Doclang nyaéta kadaharan khas Bogor anu dijieunna tina campuran pésor (jiga leupeut), keureutan tahu goréng, keureutan goréng kentang kulub, kulub endog, bungbu kacang éncér, kécap jeung kurupuk atawa emping tangkil.[1][2] Baheula mah kadaharan ieu téh biasana dipaké jang nyarap, saacan barudak angkat ka sakola atawa kolot nu rék digarawé.[1] Taun 1960-an mah di pilemburan téh réa kénéh nu jualan doclang di imah-imah warga, ari jualanna ti samet carangcang tihang nepi ka haneut moyan.[1] Aya ogé nu dagang doclang ngider maké tanggungan.[1] Ngan teuing ti iraha di pilemburan téh geus leungit nu daragang doclang téh, meureun éléh saing jeung kadaharan instan ajang menu nyarapna.[1]

Doclang

Kadaharan ieu bisa disebut mirip jiga kupat tahu jeung lontong sayur.[1] Ti sakumna bahan-bahan ajang nyieun doclang, ngan ukur pésor jigana nu can pati dipikanyaho ku réa jelema.[1] Bahan jang nyieun doclang lianna mah geus teu bireuk deui, tahu goréng, kulub kentang nu digoréng, kulub endog, bungbu kacang éncér, kécap, kurupuk jeung emping tangkil.[1][2] Sawatara tukang dagang doclang masih kénéh aya nu panatik maké kécap cap Zebra ti Bogor, sanajan tangtuna bisa maké kécap asin atawa kecap amis mérek lian.[1]

Ari pésor nyaéta jiga leupeut ngan dibungkusna lain ku daun cau tapi ku daun patat, bentukna pasagi panjang ukuranna kira-kira sajeung opat ramoeun.[1] Ari cara nyieun pésor téh nyaéta bahan baku utamana béas, diisikan tuluy diengkeun, geus kitu dibungkus ku daun patat, dikulub wéh lilana opat jam.[1][2] Ari ngulubna maké hawu ku suluhna batok kalapa, lantaran mun ngulubna maké kompor minyak tanah merlukeun waktu dalapan jam nepi asak téh, mun ku kompor gas mah leuwih gancang ngan merlukeun waktu tilu jam ngan édas bisa méakkeun gas 2 tabung nu 5 kg.[1] Daun patat pamungkus pésor, éta biasa ngalana di leuweung siga di leuweung tutugan gunung salak di kampung Karacak, Leuwiliang.[1] Pamakéan daun patat salaku pamungkus pésor dikocapkeun salaku kabiasaan jeung ajang mertahankeun ciri khas pésor salaku bahan utama doclang, sabab sabenerna mah bisa ogé maké daun cau ajang mungkusna utamana mah daun cau batu jeung daun cau kepok.[1]

Rujukan édit

  1. a b c d e f g h i j k l m n Kompasiana. Doclang Makanan Khas Bogor. Ditempona tanggal 16 Mei 2017.
  2. a b c Masakan Dapurku. Resep Membuat Doclang Khas Bogor. Ditempona tanggal 16 Mei 2017.