Parebut sééng
Parebut sééng nyaéta kasenian has Cimandé, Kacamatan Caringin, anu baheulana sering ditampilkeun dina acara kawinan. Dina éta kasenian, para jawara silat Cimandé ti pihak lalaki nyobaan ngarebut sééng nu aya di pihak awéwé.[1]
Seni parebut sééng mangrupa pidangan anu sipatna éstétis.[2] Idé garapanana dikasangtukangan ku ayana upacara adat parebut sééng anu sipatna ritual.[2]
Runtuyan prosési Parebut sééng anu dilaksanakeun di Alun-alun Tanjung Salikur di kawasan Kampung Budaya, Kampung Pasir Eurih, Désa Taman Sari Kacamatan Taman Sari, Bogor, dina poé Minggu, tanggal 22 Mei 2011:
Dina awal prosési Parebut Sééng, aleutan rombongan lalaki datang nyampeurkeun ka tempat aleutan awéwé anu nungguan di tungtung alun-alun Tanjung Salikur beulah kidul.[3] Sanggeus témpas sindir, aleutan pangantén lalaki mawa seserahan mangrupa saniskara hasil panén anu digotong dina dongdang sarta domba pikeun dipasrahkeun ka kolot calon pangantén awéwé.[3]
Teu lila, sanggeus masrahkeun seserahan, srog jawara-jawara burey maju ka tengah alun-alun.[3] Kalawan parigel, jawara-jawara anu barurey kénéh téh mimiti ijén marebutkeun sééng, parabot pikeun nyangu anu ditalikeun dina tonggong jawara séjénna.[3]
Sanggeus réngsé ijén antarjawara burey, dituluykeun ku sapasang jawara déwasa maké pirigan gendang penca ngamimitian ijén adu jurus, satékah polah ngarebut jeung mertahankeun sééng.[3]
Dina ijén patutunggulanana, maranéhna silihteunggeul jeung silihtajong pikeun ngalumpuhkeun lawan supaya bisa ngarebut sééng ti jawara anu mawana.[3] Waktuna lima menit pikeun ngarebut jeung mertahankeun sééng.[3]
Dina éta ijén, anu dipeunteun téh opat rupa nyaéta wiraga (gerakan silat), wirasa (Neleban, ngalenyepan), wirahma (gerakan saluyu jeung pirigan gendang penca), wira cipta (kréasi ngarebut sééng).[3]
Rujukan
édit
|
Artikel ngeunaan Sunda ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |