Pierre Tendean
Pierre Andries Tendean nyaéta salah sahiji pahlawan révolusionér anu maot dina kajadian G30SPKI taun 1965. Biasana disebut Pierre Tendean, lahir tanggal 21 Pebruari 1939 di Batavia, Hindia Walanda. Pierre lahir ti Maria Elizabeth Cornet jeung Aurelius Lammert Tendean. Waktu harita, Pierre lahir jam 08.10 di rumah sakit rahayat anu disebut Centrale Burgerlijke Ziekeninrichting (CBZ). Rumah sakit ieu diadegkeun ku kolonial Walanda, ayeuna éta rumah sakit téh Rumah Sakit Umum Pusat Nasional (RSUPN) dr. Cipto Mangunkusumo.[1]
Keur Leutik
éditDina waktu éta, Pierre Tendean lahir dina jaman kolonialisme anu mimiti ripuh. Dina jaman harita loba pisan akulturasi budaya antara pendatang jeung pribumi, ieu kajadian ka kolot Pierre, nyaéta Maria Elizabeth Cornet, awéwé ti Leiden, Walanda ogé katurunan Perancis. Awéwé nu jadi indungna Pierre Tendean kawin jeung pribumi, psikiater atawa doktor spésialis jiwa katurunan Minahasa ngaranna Aurelius Lammert (A.L) Tendean. Hasil perkawinan ieu, ngahasilkeun hiji inohong nu ngaranna lengkep Andries Pierre Tendean. Ku alatan éta, Pierre Tendean boga getih campuran sababaraha ras, diantarana Kaukasian (Perancis) jeung Minahasa.[1]
Pierre Tendean nyaéta anak kadua sanggeus lanceukna Mitzi Farre, sarta Pierre boga adi ngaranna Rooswidiati. Ngaran lengkep Pierre Tendean dicokot tina ngaran akina indungna anu katurunan Perancis, Pierre Albert, sedengkeun ngaran Andries dicokot tina ngaran akina ti pihak bapa anu katurunan Minahasa, sarta ngaran Tendean mangrupa ngaran marga kulawarga.[1]
Pierre mangrupa hiji-hijina budak dina kulawarga idéal salila jaman kolonial. Waktu éta, Pierre leutik cicing di Jalan Cornelius Laan No. 4, Weltevreden, wewengkon nu baheulana mangrupa padumukan utama urang Éropa di pinggiran Batavia. Ayeuna wewengkonna nyaéta Jalan Gunung Sahari II, anu perenahna di Kacamatan Sawah Besar, Jakarta Pusat.[1]