Zainal Asikin Kusumah Atmaja

Prof. Zainal Asikin Kusumah Atmadja, S.H. ( Padang Kota, Sumatera Barat, 19 Juli 1928) nyaéta Hakim, Guru Besar, pangsiunan Hakim Agung. Anu kadua ti 13 dulur, anak Prof. Dr. R. Sulaiman Éfféndi Kusumah Atmaja anu jadi Pupuhu Mahkamah Agung Républik Indonésia anu kahiji. Zainal Asikin tamatan ELS Semarang (1940), ngalanjutkeun ka SMP di Semarang ogé (tamat 1945). SMAna Di Yogyakarta (1945). Satamat SMA ngalanjutkeun ka Fakultas Hukum Universitas Indonesia di Jakarta ( tamat 1954). Saenggeus jadi Sarjana Hukum ( wanci éta masih Meester In de Rechten atawa Mr.), manéhna gawé di Pangadilan Negeri Jakarta, sataun saenggeusna jadi Panetera jeung taun 1956 jadi hakim. Tapi di taun éta ogé manéhna dipindahkeun ka Pangadilan Negeri Purwakarta, dua taun saenggeusna (1958) diangkat, jadi Pupuhu Pangadilan Negeri Puwakarta. Taun 1960 manéhna dipindahkeun jadi Pupuhu Pangadilan  Negeri Tanjung Pinang. Di taun 1963 dipindahkeun deui ka Jakarta jadi Wakil Pupuhu Pangadilan Negeri Jakarta. Taun 1968 diangkat jadi Hakim Agung di Mahkamah Agung Républik Indonésia. Jabatanna anu terahir nyaéta Hakim Muda Mahkamah Agung Bidang Hukum Perdata Tertulis Peradilan Umum, nu dijabat nepi ka pangsiun. Salaku Hakim, Asikin kasohor ku jujur jeung ngusahakeun méré kaputusan anu saadil-adilna. Kaputusanna ngeunaan perkara Kedungombo anu meunangkeun gugatan ti masarakat leutik jeung ngalahkeun pamaréntah, ngagégérkeun jeung saenggeus dianulir ku Pupuhu Mahkamah Agung. Masarakat Kedungombo anu taneuhna dijadikeun bendungan, ngagugat ka Gubernur jeung pamaréntah anu tindakanna sawenang-wenang ku ngusir maranéhnana ti taneuh jeung désana ku ganti rugi nu teu nyukupan pisan.