Letjen (purn.) Achmad Wiranatakusumah (gumelar di Bandung, Jawa Barat, 11 Oktober 1925 – maot 26 Séptémber 1999 dina umur 73 taun) mangrupa sala sahiji tentara anu kantos mangku jabatan salaku Kepala Misi Pengembalian Irian Barat ti Walanda, Panglima Kostrad, sareng Sekretaris Jenderal Dewan Pertahanan Keamanan Nasional. Riwayat pendidikan formalna dikawitan ti ELS nu aya di Bandung. Saatos réngsé sakola ELS taun 1938, anjeunna ngalajeungkeun sakola ka Lyceum di Jakarta salami 4 taun dugi ka 1942. Dina munggaran révolusi, anjeunna kantos kaamanahan janten Komandan Batalyon 3 nu kawengku dina Divisi 1 Badan Keamanan Rakyat (BKR) anu katelah "Batalyon Ahmad", tuluy janten Komandan Batalyon 26, Brigade Guntur dina taun 1947, ogé janten Komandan Batalyon 3, Brigade Infanteri 13/Siliwangi anu kungsi ngalih ka Yogyakarta sareng aktif ngéléhkeun pemberontakan PKI di Madiun.[1]

Achmad Wiranatakusuma
Gumelar11 Oktober 1925
Walanda Bandung, Jawa Kulon, Hindia-Walanda
Tilar dunya26 Séptémber 1999 (yuswa 73)
PagawéanPerwira tinggi TNI

Salian ti eta, anjeunna kantos janten Inspektur Akademi Militer di Yogyakarta taun 1949, ogé Komandan Brigade G di Kalimantan Barat taun 1950, Komandan Brigade Pendaratan Pasukan Amfibi di Maluku taun 1951, Kepala staff sareng naék janten Komandan Sektor Cianjur dina taun 1952. Dina taun 1953, janten Komandan Resimen Infanteri 8 sareng T&T III Siliwangi, Bogor. Teu mung ukur sakitu, anjeuna ogé kantos ngiring salaku anggota misi persiapan pasukan PBB di Gaza, Sinai, Timur Tengah anu lumangsung dina taun 1956. Tuluy disambung janten Staff Umum Angkatan Darat (SUAD) sareng pembantu Menteri untuk Stabilitas Umum dina taun 1958, Perwira menengah dbp KSAD taun 1959.[1]

Kanggé nambihan élmuna di widang militér, Kang Ahmad ngiring palatihan lanjutan di U.S. Army Command and General Staff College di Fort Leavenworth, Kansas, Amerika Serikat ti taun 1959 dugi ka 1960. Saatos éta, anjeunna teras kapercanten janten Kepala Staff Korps Tentara 1/Cadangan Umum AD dina taun 1961 sareng janten Kepala Staff Pasukan Gabungan "Mandala" ngarebut Irian Barat dina taun nu sami. Teras kapercanten ogé janten Kepala Misi Mulangkeun Irian Barat ti Walanda dina taun 1962 nu ngajadikeun anjeunna naék pangkat janten Kepala Kostrad ti kawit taun 1963 dugi taun 1966, sareng naék deui janten Panglima Kostrad salami 2 taun dugi ka taun 1967 teras janten Perwira Tinggi dbp SUAD taun 1968.[1]

Sok sanaos teu anom deui, Kang Ahmad masih mangku jabatan anu ahéng dina widang kemilitéran, lepas ti Perwira Tinggi dbp SUAD, dua taun saatosna, nyaéta dina taun 1970, anjeunna kenging deui kapercantenan janten Kepala Lembaga Pengkajian Strategi AD. Saatos éta, lajeung nyepeng amanah janten Deputi Sekjen Dewan Pertahanan Kéamanan Nasional antara taun 1974 sareng 1978, teras naék janten Sekjen Dewan Pertahanan Kéamanan Nasional dugika taun 1986. Pungkasna, anjeunna pensiun kalayan pangkat Letnan Jenderal.[1]

Rujukan édit

  1. a b c d Rosidi, Ajip, 1938-; Pustaka Jaya (Firm) (2000). Ensiklopedi Sunda : alam, manusia, dan budaya, termasuk budaya Cirebon dan Betawi (Cet. 1 ed.). [Jakarta]: Pustaka Jaya. ISBN 9794192597. OCLC 45463431.