Ngawuluku
Ngawuluku asal kecapna tina wuluku anu hartina parabot paranti nyambut sawah, sedengkeun ngawuluku ngagunakeun wuluku.[1]
Pakakas nu dipaké édit
Pasangan nyaéta parabot paranti ngahijikeun munding anu rék digawékeun, dijieun tina kai, dipasangan dina punduk munding [2]. Babagian pasangan:
- Sambilan nyaéta kai nu ngahapit kana beuheung munding.[2]
- Sawed atawa tali sawed nyaéta tali anu meulit kana beuheung munding. Dina sesebutan waktu urang Sunda, aya nu disebut pecad sawed (kira-kira jam 10.00), dicokot tina waktu dipecatkeunana tali sawed tina beuheung munding téa (pikeun ngareureuhkeun munding) nu ilaharna kira-kira jam 10.00.[2]
- Tinggar manuk nyaéta paseuk anu ditancebkeun dina pasangan, paranti ngaitkeun konali.[2]
- Konali nyaéta tali anu nyambungkeun pasangan jeung cacadan singkal atawa garu.[2]
Singkal nyaéta parabot paranti nyungkalkeun taneuh (paranti ngawuluku). Babagian singkal:
- Babantal nyaéta bagian handap singkal, tempat napelna lanjam.[2]
- Lanjam nyaéta seuseukeut singkal, bahanna tina beusi.[2]
- Bubuntut nyaéta kai anu napel kana babantal nu biasa dicekel ku nu keur ngawuluku.[2]
- Cacadan nyaéta ruyung atawa awi anu dipaké panyéréd singkal (garu) anu ngahubungkeun wuluku jeung munding.[2]
- Paseuk, aya dua rupa nyaéta :
- paranti muntangna cacadan kana bubuntut.[2]
- paranti nungkulkeun atawa nanggahkeun kabantal, ngatur jero déétna tapak singkal.[2]
Garu nyaéta pakakas paranti ngalembutkeun taneuh beunang macul atawa beunang ngawuluku.[2] Babagian garu:
- Huntu garu nyaéta dijieun tina ruyung atawa beusi anu nyocod dina garu, wangunna kawas sisir.[2]
- Cagak nyaéta panahan cacadan anu luhur, paranti diuk tukang munding.[2]
- Kokolécéran nyaéta kai anu dipaké mageuhan cacadan anu luhur.[2]
- Cacadan nyaéta awi anu nyodor ka hareup, anu dipaké narik garu.[2]
- Pamélét nyaéta awi paranti ngaratakeun taneuh lamun geus lembut.[2]