Pupujian

Pupujian nyaéta puisi buhun anu eusina nyoko kana ajaran agama Islam. Pupujian asalna tina sa'ir, nyaéta puisi anu asalna tina sastra Arab. Ku lantaran kitu, pupujian mah wangunna euweuh bédana jeung sa'ir, diwangun ku opat padalisan dina sapadana, sarta unggal padalisanna diwangun ku dalapan engang. Tapi sanajan kitu, aya ogé anu diwangun ku dua padalisan, genep padalisan, dalapan padalisan dina sapadana. Purwakanti dina pupujian umumna purwakanti laras wekas. Leuwih jéntréna pupujian téh asal kecapna tina puji nu ngalaman dirajék dwipurwa ditambahan rarangkén tukang -an, nu hartina kecap-kecap atawa ucapan pikeun ngagungkeun nu maha kawasa, lian ti éta aya ogé nu eusina muji ka Rosulluloh Muhammad Saw.

Tempat jeung Waktu

Pupujian biasana dikawihkeun babarengan (rampak) ku para jama'ah bari ngadagoan solat magrib, ku para santri saréngséna ngaji, tiku para jama'ah di pangajian (tablég) bari ngantay sasalaman. Intina mah pupujian téh jadi panyelang dina rupaning ibadah. Nilik kana médiana, pupujian téh hirupna sacara lisan (dikawihkeun), apalna ku pangrungu, mantak pantes wacanana parondok.

Pungsi Pupujian

Sacara gurat badagna mah, pungsi pupujian téh aya anu mibanda fungsi éksprési jeung aya nu mibanda fungsi sosial. Tapi dina kamekaranana, pungsi sosialna leuwih gedé tibatan fungsi éksprésina. Cara maca pupujian téh sok dikawihkeun atawa dinadomkeun. Umumna dibacana téh di masjid saméméh solat jamaah, di madrasah, pasantrén, jeung dina acara-acara anu aya patalina jeung kaislaman.

Wanda Pupujian

Dumasar kana eusina, pupujian téh bisa digolongkeun kana sababaraha golongan nyaéta, (1) muji ka Pangéran Alloh, (2) solawat ka Kanjeng Nabi, (3) do'a jeung tobat ka Pangéran, (4) pépéling, jeung (5) ajaran agama.

Conto pupujian pépéling

Éling-éling dulur kabéh

Éling-éling dulur kabeh

ibadah ulah campoléh

beurang peuting ulah weléh

bisina kaburu paéh

Sabab urang bakal mati

nyawa dipundut ku Gusti

najan raja nyakrawati

teu bisa nyingkirkeun pati

Karasana keur sakarat

Nyerina kaliwat-liwat

Kana ibadah diliwat

Tara ngalakukeun solat

Kaduhung kaliwat langkung

Tara nyembah ka Yang Agung

Sakarat nyeri kalangkung

Jasadna teu meunang embung

Kautamaan Solat Berjamaah

Éling-éling umat Muslimin muslimat

Hayu urang solat berjamaah Isa

Éstu kawajiban urang ker di dunia

Kanggo pibekelen jaga di akhérat

Anu ngalanggengken solat berjamaah

Éta aya lima rupa kauntungannana

Hiji dilengitkeun kapakirannana

Dua dilengitkeun siksaan kuburna

Tilu dibéré buku ti katuhuna

Opat bakal ngaliwatanna cukangna

Cara kilat nyamber bawaning kilat lepasna

Lima teu dihisab asup ka surgana.

Kakuping Suara Adzan

Kakuping suara adzan

Di Masjid ti katebihan

Singhoréng téh ngawartosan

Ngajak solat babarengan

Ulah sok solat di Imah

Salila aya masjid mah

Pribumi atawa sémah

Hayu solat berjamaah

Solat téh tihang agama

Nu pangpayunna ditaors

ku Gusti Allah Ta'ala

Hayu solat berjamaah

Ka jalma nu hayang bagja

nampa panggilan berharga

Yakin Allah pangagungna

Wajib dipayunkeunana

Sanajan keur tibra saré

Solat mah teu meunang peré

Ulah sok diengké-engké

Bisi Kaburu jadi bangké