Sari téh majalah bulanan basa Sunda anu diterbitkeun ku Bale Kasenian Sunda ti mimiti bulan Nopember 1962.[1] Sesepuh jeung pananggungjawabna R.Ondo Kartadinata.[1] Ieu majalah nyebut manéh majalah kasenian jeung panglipur, di jerona dimuat rupaning carita pondok, carita nyambung, sajak, artikel-artikel kasenian, pendidikan, olah raga, bahasan elmu pangaweruh umum, lulucon, carita wayang,pangalaman, dangding, sajak,jeung laporan jurnalistik.[2] Rengrengan redaksi ieu majalah téh nyaéta: Tb.O. Martakusuma, M.A. Salmun, R. Supyan Iskandar, R. Muh. Affandi, D. Rachman Sainan, Koko Koswara, S. Aditirta, R.A. Affandie (RAF), Pepe Sjafei R.A.Eddi Koswara, Apung S. Wiratmadja jeung Yaya Sunarya.[1] Najan kaasup majalah umum, tapi di jerona réa ngutamakeun ngamuat karya sastra jeung artikel-artikel seni budaya.[3] Karya-karya M.A. Salmun saliana midang dina unggal nomer kalawan maké rupa-rupa sandiasma saperti Hajati, Dulacis,Narayana, Abracadabra, jeung inisial M.A.S. Ieu majalah terbit nepi ka taun 1967.[1]




Rujukan édit

  1. a b c d Rosidi,Ajip,dkk.Ensiklopedi Sunda: Alam,Manusia, dan Budaya.Pustaka Jaya.Jakarta 2000.kaca 577
  2. Rusyana, Yus,spk. Ensiklopedi Sastra Sunda. Pusat Pembinaan dan Pengembangan Bahasa Depdikbud.Jakarta 1986.kaca 26
  3. Kartini,Tini,spk.Biografi dan Karya Sasatrawan Sunda Masa 1945-1965.Proyek Penelitian Bahasa dan Sastra Indonesia dan Daerah Depdikbud.Bandung1978.kaca 26