Balubur Limbangan nyaéta ngaran hiji kacamatan di Kabupatén Garut.[1] Ieu tempat miboga sajarah nu kalintang gedéna, lantaran Balubur Limbangan kungsi dijadikeun ibukota kabupatén Garut dina mangsa nu kaitung lilana.[1] Cindekna bisa disebutkeun yén Limbangan téh mangrupa tuturus ayana Garut ayeuna.[1]
Sakumaha nu kacatet dina sajarah, mimitina mah Limbangan téh bagéan tina karajaan Sunda.[1] Aya ogé nu nyebutkeun yén Limbangan téh geus jadi daérah otonom nalika Karajaan Sunda kabagi dua, Galuh jeung Sunda.[1] Harita ngaranna masih kénéh Rumenggong nu asalna tina kecap ‘rumenggang’ hartina jauh lantaran aya di antara Galuh jeung Sunda.[2] Pangawasana kasohor ku sebutan Sunan Rumenggong.[2] Sanggeus karajaan Sunda runtag, daérah ieu dikawasa ku Sumedang Larang.[2]
Tanggal 24 Maret 1706, Limbangan nu asalna ngan mangrupa distrik di handapeun Kabupatén Sumedang, ku VOC (Verenigde Oost Indiche Compagne-Kongsi Dagang Walanda) statusna dirobah deui jadi kabupatén nu mandeg mandiri kalawan Rangga Mertasinga salaku bupatina.[2] Ampir saabad lilana Limbangan jadi kabupatén, nepi ka tanggal 2 Maret 1811, Gubernur Jenderal Daendels ngabubarkeun Kabupatén Limbangan lantaran sawatara alesan.[2]
Nalika Inggris ngawasa, Gubernur Jendral Raffles nu ngawakilan kakawasaan Inggris malikkeun deui status Limbangan jadi kabupatén di Karesidénan Priangan dina tanggal 16 Pebruari 1813 kalawan Tumenggung Adiwidjaja salaku bupatina.[2] Tapi ibukota kabupatén nu awalna di Balubur Limbangan dipindahkeun ka Distrik Suci tuluy dipindahkeun deui ka kota Garut nu ayeuna nepi ka kiwari.[2]

Referensi édit

  1. a b c d e Balubur Limbangan Archived 2011-10-16 di Wayback Machine (Diakses tanggal 29 Oktober 2011) (id)
  2. a b c d e f g Suhardiman,Budi&Darpan.2007.Seputar Garut.Garut:Komunitas Srimanganti (id)