Dodol Garut
Dodol nyaéta jawadah nu liket jeung dalit pisan.[1] Dodol Garut mangrupa salah sahiji kadaharan tradisional sarta hiji komoditas nu bisa ngangkat ngaran Garut salaku kabupatén produsén dodol nu miboga kualitas luhung, alus sarta dodol nu dihasilkeun ogé kacida loba rupana.[2] Dodol garut ogé geus kasohor ka mana-mana lantaran rasana nu béda jeung dodol nu sarupa ti daérah lianna.[2] Industri dodol di Garut mimiti mekar ti taun 1926 ku Ibu Karsinah ngaliwatan prosésna nu kawilang basajan pisan nu satuluyna terus mekar nepi ka kiwari.[2] Hal éta alatan:
- mibanda rasa nu béda sarta miboga kaleuwihan dibandingkeun dodol ti daérah nu séjénna.
- Hargana murah bisa kahontal ku sakumna masarakat sarta mangrupa kadaharan nu kawilang dipikaresep ku masarakat.
- Cara nyieunna kawilang basajan sarta bahan-bahanna ogé gampang ditéanganana.
- Henteu ngagunakeun bahan pangawét jeung panambah kadaharan lian nu sipatna sintetis.
- mibanda kakuatan nu kawilang lila kurang leuwih 3 bulan.
Ieu komoditi gampang pikeun dimekarkeunana ku cara ngaréka bahan bakuna nyaéta ngamangfaatkeun bahan lain saperti waluh, kentang, kacang, gedang, ganas, sirsak jeung réa-réa deui.[2] Salian ti éta, pamaréntah daérah ogé milu ancrub dina pemasaran ngaliwatan paméran-paméran, ogé ngaropéa kualitas produk dodol nu geus dipasarkeun.[2]
Cara Nyieun Dodol Garut
éditDina prosés nyieun dodol Garut, kabersihan jadi hiji hal nu pangpentingna.[3] Bahan-bahan nu diperlukeun pikeun nyieun dodol di antarana, cipati, gula bodas, gula beureum, ketan jeung uyah.[4] Cara nyieun dodol Garut: Bahan-bahan nu geus disadiakeun dihijikeun kana kancah sarta dipasak dina seuneu nu sedeng.[4] Dodol nu keur dipasak tong diantepkeun kitu waé bisi tutung handapna sarta jadi kerak.[4] ku lantaran kitu, nalika nyieun dodol urang kudu tuluy ngocék-ngocék éta bahan nu geus dihijikeun sangkan ngahasilkeun dodol nu hadé tur ngeunah.[4] Waktu nu dibutuhkeun pikeun ngagotrokkeun ieu bahan kurang leuwih salila 4 jam.[4] Sanggeus 2 jam, warna dodol robah jadi warna coklat semu kahideung-hideungan. Nalika éta ogé adonan dodol geus ngagolak nandakeun yén dodol téréh asak.[4] Sanggeus kitu asupkeun panambah rasa saperti coklat, wijén, susu, jahé, moka jeung nu lianna luyu jeung kahayang urang.[3] Tuluy éta dodol diasupkeun kana wadah sarta tiiskeun salila sapeuting.[3] Sanggeus tiis, dodol dikeureutan tuluy dibungkus. Dodol siap dipasarkeun.[3]
Dodol Picnic
éditKiwari dodol diproduksi sacara modérn nuturkeun kamekaran jaman.[5] salah sahiji dodol garut nu kasohor nyaéta dodol méré k Picnic.[5] Dodol Picnic diproduksi sacara modérn ku PT Herlina Cipta Pratama di hiji pabrik nu kawilang gedé di daérah Pasundan Garut.[5] Ieu dodol teu saukur dijual di sakuliah nusantara tapi dijual ogé ka luar nagri.[5] Dodol Picnic khas Garut ieu bisa kasohor nepi ka luar nagri alatan tarékah jeung usaha Haji Iton, nu miboga pabrik dodol picnic.[5] Dina sajarahna, dodol Picnic kungsi sababaraha kali ganti ngaran jeung bungkus luar (kemasan) alatan pangaruh pasar sarta saingan jeung pihak lianna.[5] Mimiti medal ieu dodol maké méré k Halimah.[5] taun 1950 diganti jadi dodol Fatimah.[5] Tuluy taun 1954 ganti deui jadi dodol Purnama.[5] Kitu ogé jeung bungkus nu dipakéna ngalaman parobahan, ti mimiti keretas biasa tuluy diganti ku kertas minyak jeung plastic PVC.[5] Tina dodol Purnama ganti deui jadi dodol Herlina, bungkusna mimiti ngagunakeun kertas duplék.[5] Ieu mérek Herlina teu lana diganti deui ku dodol Picnic nu dipaténkeun tanggal 14 Juli 1959 tug nepi ka kiwari kasohor ka mana-mana.[6]
Référénsi
édit- ↑ Danadibrata,R.A.2006.Kamus Basa Sunda.Bandung:Kiblat Kaca 173
- ↑ a b c d e Dodol Garut Archived 2011-09-25 di Wayback Machine (Diaksés tanggal 19 September 2011)
- ↑ a b c d Mengintip Proses Pembuatan Dodol Garut (Diakses tanggal 24 September 2011)
- ↑ a b c d e f Dodol Garut Special Quality Archived 2012-02-12 di Wayback Machine (Diakses tanggal 25 September 2011)
- ↑ a b c d e f g h i j k Suhardiman,Budi&Darpan.2007.Seputar Garut.Garut:Komunitas Srimanganti kaca 37
- ↑ Suhardiman,Budi&Darpan.2007.Seputar Garut.Garut:Komunitas Srimanganti kaca 38