Munara Eiffel
Munara Éiffel nyaéta ngaran munara beusi anu diwangun di Champ de Mars di sisi Walungan Seine, Paris.[1] Ieu munara téh minangka landmark kota Paris, Perancis anu geus kakoncara di sakuliah dunya.[1] Ieu munara diwangun antara taun 1887 jeung 1889 minangka panto asup ka Exposition Universelle, Paméran Dunya anu ngarayakeun saabad Révolusi Perancis.[1] Éiffel sabenerna boga rarancang ngawangun munara di Barcélona, pikeun Pameran Universal taun 1888, tapi para pihak anu tanggung jawab di Balai Kota Barcelona nganggap hal éta ahéng sarta mahal, sarta teu cocog jeung dayeuhna.[1]
.jpg)
Ieu munara diresmikeun dina tanggal 31 Maret 1889, sarta dibuka tanggal 6 Méi.[1] Pangwangunan ieu munara dipigawé ku tilu ratus pagawé[1] sarta dipingpin ku Tuan Gustave Eiffel dibantuan ku insinyur Maurice Koechlin, Emile Nouguier sarta Stephen Sauvestre minangka arsiték.[2] Ieu munara téh dijieun tina 18.083 bagian beusi waja (wangun murni tina beusi struktural) anu diterapkeun ku dua satengah juta paku.[1][2] Carangka beusi ieu dirénovasi saban tujuh taun sakali sarta dicét kalayan 50 ton cét.[2] Ti taneuh nepi ka tihang bandéra, jangkungna 312,27 méter dina taun 1889, kiwari mah 324 méter kaasup anténeuna.[2] Ieu munara téh dipiboga ku Pamaréntah kota Paris sarta dikokolakeun ku pausahaan swasta, "Société Nouvelle de l'Exploitation de la Tour Eiffel".[2] Munara ieu dicaangan ku 352 projektor 1.000 watt sarta ngiceup saban satengah jam nalika peuting, kalayan 20.000 lampu sarta 800 lampu disko.[2] Sangkan ieu munara katempona leuwih hirup, 4 lampu laser xenon anu 6.000 watt, muter sacara permanen di penclut munara.[2]
Referensi
édit- ↑ a b c d e f g Sejarah Menara Eiffel Archived 2011-10-25 di Wayback Machine (id) (Diakses ping 5 November 2011)
- ↑ a b c d e f g Menara Eiffel Archived 2011-10-27 di Wayback Machine (id) (Diakses ping 5 November 2011)