Wikipédia

Adi Hidayat

ulama asal Indonésia

Ustad Adi Hidayat, Lc., MA. (gumelar di Pandéglang, Banten, 11 Séptémber 1984; umur 40 taun) nyaéta saurang ulama asal Indonésia anu calakan kana eusi Al-quran jeung posisi barisna. Lian ti kitu, Adi Hidayat ogé juga ahli kana élmu hadits ogé rupa-rupa kitab pon makna sarta posisina. Taun 2013, Ustad Adi ngadegkeun Quantum Akhyar Institute[1] tuluy selang tilu taun Ustad Adi ngadegkeun Akhyar TV[2] minangka média da'wah utama. Kiwari Ustad Adi aktif jadi narasumber boh dina ta’lim, seminar, jeung sajabana. Anjeunna ogé aktif nulis sarta geus ngahasil nukil sawatara karya boh dina basa Arab boh dina basa Indonésia.

Adi Hidayat di Bandung, 2018

Ustad Adi Hidayat mitembeyan atikan formalna di TK Pertiwi Pandéglang taun 1989 tuluy lulus kalawan dilélér jadi murid pangnyoncolangna. Laju neruskeun atikan dasar di SDN Karaton 3 Pandéglang nepi ka kelas 3 sarta pindah ka SDN III Pandéglang ti kelas IV nika kelas VI na mah. Di ieu dua sakola ogé anjeunna meunang gelar murid pangnyongcolangna deui waé, nika diasupkeun di kelas unggulan nu ngahimpun sakumna murid nu panghararadéna tingkat dasar di Kabupatén Pandéglang. Dina ieu program, anjeunna ogé jadi siswa tuladan kalawan réngking kahiji. Dina ieu prosés atikan dasar, Adi Hidayat leutik ogé disakolakeun ku kolotna ka Madarasah Salafiyyah Sanusiyyah Pandéglang. Isuk di sakola umum, beurangna di sakola agama. Di ieu madrasah, anjeunna ogé jadi siswa nu nyongcolang sarta didaulat jadi ajengan cilik dina unggal sési wisuda santri.

Taun 1997, laju nuluykeun atikan Tsanawiyyah nepi ka Aliyah (satata SMP-SMA) di Ponpés Darul Arqam Muhammadiyyah Garut. Ponpés nu ngadumaniskeun atikan Agama jeung umum kalawan proporsional sarta geus nyitak loba alumni nu makalangan di tingkat nasional jeung internasional. Di ieu Ponpés Ustad Adi meunang bekel dasar utama dina rupa-rupa disiplin pangaweruh, boh umum boh agama. Ari guru utamana, nyaéta Buya KH. Miskun as-Syatibi anu mibanda pangaruh dina ngahudang kacintana kana al-Qur’an sarta paneuleuman pangaweruh.

Na mangsa ngalap élmu, Ustad Adi loba dilélér pangajén boh di tingkat Pondok, Kabupatén Garut, malah mah Propinsi Jawa Kulon, hususna mah dina perkara syarh al-Qur’an. Di tingkat II Aliyah mah malah pernah jadi utusan pangorana dina program Daurah Tadribiyyah ti Universitas Islam Madinah di Ponpés Taruna al-Qur’an Jogjakarta. Anjeunna ogé mindeng dilibatkeun ku uwana KH. Rafiuddin Akhyar, pangadeg Déwan Da'wah Islam Indonésia di Banten pikeun ilubiung dina misi da'wah di wewengkon Banten.

Ustad Adi Hidayat lulus kalawan prédikat santri tuladan dina 2 widang sakaligus (agama jeung umum) sarta didaulat mertélakeun makalah ilmiah “konsep ESQ dalam al-Qur’an” di hareupeun inohong atikan M. Yunan Yusuf. Taun 2003, anjeunna meunang ondangan PMDK ti Fakultas Dirasat Islamiyyah (FDI) UIN Syarif Hidayatullah Jakarta anu digawébareng jeung Universitas al-Azhar Kairo, nepi ka ditarima sarta meunang gelar mahasiswa pangnyongcolangna dina program ospék. Taun 2005, anjeunna meunang ondangan husus pikeun neruskeun studi di Kuliyya Dakwah Islamiyyah Libya nu tuluy ditarima, sanajan kudu ninggalkeun program FDI kalawan beubeunangan IPK 3,98.

Di Libya, Adi Hidayat diajar kalawan inténsif, ari anu dipiajarna rupa-rupa disiplin élmu boh patalian jeung al-Qur’an, Hadits, Fiqih, Ushul Fiqih, Tarékh, Lugoh, jeung sajabana. Katresnana kana al-Qur’an jeung Hadits ngajadikeunana nyokot program husus Lughah Arabiyyah wa Adabuha pikeun neuleuman ma'na ieu dua sumber syaréat. Lian atikan formal, anjeunna ogé batalaqqi dina masyayikh basanad boh di Libya boh di nagara nu pernah didatanganana. Anjeunna diajar al-Qur’an ka Syékh Dukkali Muhammad al-‘Alim (muqri internasional), Syékh Ali al-Liibiy (Imam Libya pikeun Éropa), Syékh Ali Ahmar Nigeria (riwayat warsy), Syékh Ali Tanzania (riwayat ad-Duri). Anjeunna ogé diajar élmu tajwid ka Syékh Usamah (Libya). Anapon guru-guru tafsirna nyaéta Syékh Tanthawi Jauhari (Grand Syékh al-Azhar) jeung Dr. Bajiqni (Libya), élmu Hadits mah diajar ka Dr. Shiddiq Basyr Nashr (Libya). Dina perkara élmu Fiqh jeung ushul Fiqh diajarna ka Syaikh ar-Rabithi (mufti Libya) jeung Syaikh Wahbah az-Zuhaili (Ulama Syiria). Tuluy neuleuman élmu lughah liwat Syékh Abdul Lathif as-Syuwairif (Pakar basa Dunya, anggahota majma’ al-lughah), Dr. Muhammad Djibran (Pakar Basa jeung Sastra), Dr. Abdullâh Ustha (Pakar Nahwu jeung Sorof), Dr. Budairi al-Azhari (Pakar élmu Arudh), ogé masyayikh lianna. Anapon élmu tarikh, diajar ka Ust. Ammar al-Liibiy (Sajarawan Libya). Lian éta para masyayikh, anjeunna ogé aktif milu seminar jeung dialog bareng para pakar dina forum ulama dunya nu lumangsung di Libya.

Taun 2009 katompérnakeun anjeunna diangkat jadi amînul khutabâ, ketua déwan khatib jami Dakwah Islamiyyah Tripoli nu mibanda hak pikeun nangtukeun para khatib jeung pangeusi di Masjid Dakwah Islamiyyah. Anjeunna ogé aktif miluan dialog internasional bareng para pakar lintas agama, ngeusi sawatara seminar, kaasup acara tsaqafah Islâmiyyah di channel at-tawâshul TV Libya.

Awal taun 2011 anjeunna balik ka Indonésia sarta ngabina Ponpés al-Qur’an al-Hikmah Lebak Bulus. Selang dua taun anjeunna pindah ka Bekasi sarta ngadegkeun Quantum Akhyar Institute, yayasan nu icikibung dina widang studi Islam jeung pangembangan da'wah. Bulan Nopémber 2016, tuluy ngadegkeun Akhyar TV minangka média da'wah utama. Kiwari, Ustad Adi Hidayat aktif jadi narasumber kaagamaan boh ta’lim, seminar, jeung sajabana. Ogé getol nulis sarta nukil karya-karya boh dina basa Arab boh basa Indonésia, kurang leuwih 12 karya nu kahasil.[3][4][5][6].

Atikan

édit

Ustad Adi Hidayat ngaréngsékeun atikan formal di sawatara lemabaga ieu di handap [3] [7] [8] :

  • Pondok Pesantren Islam Darul Arqam Muhammadiyah, Garut (1997 - 2003)
  • UIN Syarif HIdayatullah, Jakarta (2003 - 2005)
  • Kuliyya Dakwah Islamiyyah, Tripoli, Libya (2005 - 2009)
  • UIN Sunan Gunung Djati, Bandung [9]

Karya Tulis

édit

Sawatara karya tulis Ustad Adi HIdayat di antarana[3]:

  • Minhatul Jalil Bita’rifi Arudil Khalil (taun 2010)
  • Quantum Arabic Metode Akhyar (taun 2011)
  • Ma’rifatul Insan: Pedoman Al-Qur’an Menuju Insan Paripurna (taun 2012)
  • Makna Ayat Puasa, Mengenal Kedalaman Bahasa Al-Quran (taun 2012)
  • Al-Arabiyyah Lit Thullabil Jami’iyyah (taun 2012)
  • Persoalan Hadist-hadist Populer (taun 2013)
  • Ilmu Hadist Praktis (taun 2013)
  • Tuntunan Praktis Idul Adha (taun 2014)
  • Pengantin As-Sunnah (taun 2014)
  • Buku Catatan Penuntut Ilmu (taun 2015)
  • Pedoman Praktis Ilmu Hadist (taun 2016)
  • Manhaj Tahdzir Kelas Eksekutif (taun 2017)
  • Muslim Zaman Now (2018)[10]

Rujukan

édit
  1. ↑ "Profile Ust. Adi Hidayat – Quantum Akhyar Institute" (dalam en-US). Diakses tanggal 2019-06-02.  Archived 2020-05-03 di Wayback Machine
  2. ↑ "Profil dan Biografi Ustadz Adi Hidayat - Da'i Islam Indonesia". AkhyarTV (dalam en-US). Diakses tanggal 2019-06-02.  Archived 2019-05-30 di Wayback Machine
  3. ↑ a b c "Profil dan Biografi Ustadz Adi Hidayat - Da'iIndonesia". AkhyarTV (dalam en-US). Diakses tanggal 2019-03-02.  Archived 2019-05-30 di Wayback Machine
  4. ↑ "QAI | Quantum Akhyar Institute". quantumakhyar.com. Diakses tanggal 2019-03-02.  Archived 2019-02-26 di Wayback Machine
  5. ↑ "Profil, Biografi dan Prestasi Ustadz Adi Hidayat Lc yang luar biasa". kumparan (dalam id-ID). Diakses tanggal 2019-03-02. 
  6. ↑ Abdurrahman, Muhammad Sufyan. "Berawal dari Mimpi Bertemu Rasul, Dakwah Adi Hidayat Sesak Atensi". detiknews. Diakses tanggal 2019-03-02. 
  7. ↑ https://bantentribun.id/hj-rafiah-akhyar-sosok-ibu-bersahaja-dibalik-kesuksesan-ustad-adi-hidayat-lc-ma/ Archived 2019-03-06 di Wayback Machine
  8. ↑ Administrator. "Biografi Ustadz Adi Hidayat". Pondok Pesantren Darul Arqam Muhammadiyah Daerah Garut (dalam id-ID). Diakses tanggal 2019-03-02. 
  9. ↑ Abdurrahman, Muhammad Sufyan. "Berawal dari Mimpi Bertemu Rasul, Dakwah Adi Hidayat Sesak Atensi". detiknews. Diakses tanggal 2019-03-02. 
  10. ↑ "QAI | Quantum Akhyar Institute". quantumakhyar.com. Diakses tanggal 2019-03-02.  Archived 2019-03-06 di Wayback Machine
Dicomot ti "https://su.wikipedia.org/w/index.php?title=Adi_Hidayat&oldid=660527"