Béntang Pasantrén
Béntang Pasantrén téh novel karangan Usép Romli anu diterbitkeun munggaran ku Pustaka Dasentra Bandung, taun 1983. Ukuran bukuna 18 cm x 12 cm kandelna 72 kaca.[1] Citakan kaduana diterbitkeun ku Kiblat Buku Utama Bandung, taun 2006, ukuran bukuna dirobah jadi 20,5 cm x 15 cm, kandelna mah angger 72 kaca.[2]Béntang Pasantren nyaritakeun katresna santri ka putra ajengan anu jadi rebutan lurah santri jeung santri kahot séjénna.[2] Ku katapisna dina nyusun ungkara anu direumbeuy ku humor jeung kekecapan has pasantrén beunang nyutat tina al-Qur’an, hadits, jeung kitab liana. Ieu karya Usep Romli H. M. téh kaasup karya petingan anu milu ngabeungharan sastra Sunda.[2] Dina ieu novel pangarang nembrakkeun masalah ajaran moral jeung atikan.[1] Karep kolot ngajurung anakna, kulawarga, jeung babaturan gedé pisan pangaruhna dina enggoning ngahontal nu jadi pangharepan jeung cita-cita.[1] Diajar kalawan suhud dibarung ku ihtiar tangtu bakal tinekanan luyu jeung pamaksudan.[1] Ari soal tresna jeung asmara ukur jadi salah sahiji pangrojongna dina ngahontal tujuannana.[1] Dina ieu novel pangarang kalawan écés ngagambarkeun kahirupan santri di lingkungan pasantrén.[3] Kahirupan jeung sifat santri alus pisan digambarkeun minangka bungbu katresna antara santri anu asalna tina kasang tukang atikan sakola umum, tapi ku indung bapana dipasantrenkeun lantaran hayang sina jadi ajengan siga akina jeung mojang geulis putra kameumeut ajengan nu dipikahayang tur diparebutkeun ku lurah santri jeung santri senior séjénna.[3]
Rujukan
édit
|
Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |