Jostein Gaarder
Jostein Gaarder, sastrawan asal Norwégia, lahir di Oslo taun 1952.[1] Ngamimitian karir sastrana taun 1986; medalkeun kumpulan carita pondok disusul dua novel pikeun bacaeun rumaja.[1] Dina taun 1990 meunang panghargaan ti Norwegian Literary Critics jeung hadiah sastra ti Menteri Pendidikan dan Kebudayaan pikeun bukuna The Solitaire Mystery.[1] Gaarder ogé ngajarkeun filsafat pikeun barudak sakola tingkat menengah salila kurang leuwih 11 taun di Norwégia.[1] Ayeuna mah inyana wungkul ngalakonan kahirupan salaku panulis.[1] Gaarder nganjrek di Oslo jeung kulawargana.[1]
salah sahiji karya Gaarder, Dunya Sofi, nyaéta novel ngeunaan sajarah filsafat ti mimiti awal kamekaranana di Yunani nepi ka abad kadua puluh.[1] Ieu buku munggaran medal taun 1991 dina basa Norwégia kalawan judul Sofie’s Verden, jeung nepi ka kiwari geus ditarjamahkeun kana leuwih ti 30 basa di dunya.[1] Di Jepang, ieu novel dipedalkeun ku NHK Japan Broadcast Publishing dina Juni katompérnakeun taun 1995 tur geus laku 1,6 juta éksemplar ngan ukur dina waktu genep bulan.[1] Di Jérman dipedalkeun ku Hanser Verlag dina Agustus 1993, nepi ka kiwari geus kajual leuwih ti 1,5 juta éksemplar.[1] Édisi Perancis dipedalkeun ku Du Seuil dina bulan Maret 1995 tur laku leuwih ti 800 rébu éksemplar.[1] Rata-rata di nagara-nagara anu geus narjamahkeun ieu novel, laku tepi ka 200 rébuan éksemplar.[1] Dina taun 1995 ieu novel jadi bestseller di dunya.[1]
Jostein Gaarder kungsi datang ka Indonésia tanggal 10 Oktober-13 Oktober 2011, tur méré ceramah di Universitas Indonésia.[2] Eusi ceramahna di antarana ngeunaan parobahan iklim jeung pangwangunnan anu tuluy-tinuluy.[2] Acarana lumangsung di auditorium Universitas Indonésia, kalawan diiluan ku leuwih ti 200 pamilon.[2] Datangna ka Indonésia téh diatur ku Kedutaan Besar Norwégia rampak gawé jeung Universitas Indonésia.[2]
Jostein Gaarder katémbong soson-soson dina miara iklim jeung lingkungan.[2] Inyana geus ngadegkeun hiji yayasan kamanusaan, Hadiah Sofi.[2] Ieu hadiah mangrupa panghargaan internasional pikeun lingkungan hirup jeung pangwangunnan anu tuluy-tumuluy.[2] Unggal taunna ieu yayasan ngaluarkeun waragad 100 rébu dolar Amérika.[2]
Référénsi
édit- ↑ a b c d e f g h i j k l m Gaarder, Jostein. 1997. Dunia Sophie (Tarjamah tina Sophie’s World ku Rahmani Astuti). Bandung: Mizan. ISBN 979-433-103-1
- ↑ a b c d e f g h http://www.norway.or.id/Norway_in_Indonesia/culture/Jostein-Gaarder-in-Indonesia-10th--13th-October-2011/ Archived 2011-11-20 di Wayback Machine, dikunjal tanggal 16 Nopémber 2011
|
Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |