Kawunggirang, Majalengka, Majalengka

Kawunggirang nyaéta salah sahiji désa di kacamatan Majalengka, Kabupatén Majalengka, Propinsi Jawa Barat, Indonésia.

Désa Kawunggirang
Kalurahan/Désa
Peta lokasi Kalurahan Kawunggirang
Nagara	Indonésia
Propinsi	Jawa Barat
Kabupatén	Majalengka
Kacamatan	Majalengka
Pamaréntahan
• Nami Kuwu	ILI HARIRI
Pangeusi	1758

Sajarah

Sajarah ngadegna

Taya bukti sajarah anu bisa ngajelaskeun asal usul désa Kawunggirang, sabab taya prasasti atawa hal-hal anu bisa jadi bukti kongkrit. Sajarah nu sumebar ukur mangrupa hiji carita tatalépa ngeunaan Embah bahim jeung palaputrana.

Ringkesan carita

Embah Bahim [Tubagus Ibrahim] anu makamna di astana gedé, mangrupa hiji inohong anu ngamimitian nyebarkeun agama Islam di désa Kawunggirang. Ku kituna, Embah Bahim dianggep hiji inohong nu ngadegkeun désa Kawunggirang ieu. Embah Bahim téh putrana Embah Latif. Embah Latif nyaéta putra ti Embah Pucuk Umum Fatu Talaga anu nikah jeung Maulana Ibrahim ti Baghdad, Irak.

Sanggeusna ngadeg wewengkon ieu, datang ogé ka Kawunggirang téh ulama katurunan sultan Banten nyaéta Tubagus Kacung anu nami aslina Tubagus Bunyamin. Tubagus Kacung ngahaja sumingkir ti kasultanan Banten alatan bancang pakewuh pulitik ku ayana parebut kakawasaan di kasultanan Banten.

Satuluyna Tubagus Kacung téh nikah sareng salah sahiji putra istri Embah Bahim. Tina pernikahanana, Tubagus Kacung ngagaduhan sababaraha putra. Salah sahiji putra Tubagus Kacung aya anu janten Qasli atanapi panghulu besar kasultanan Cirebon anu namina Embah Arjéan. Putra Tubagus Kacung anu sanesna nu namina Embah Abdullah Komar, janten panghulu munggaran Kabupaten Majalengka.

Asal usul ngaran Kawunggirang

Désa Kawunggirang sabenerna mah asalna tina ngaeran “Kaum Girang” nyaéta kumpulan jalma/kaom anu aya di wewengkon girang. Digantina ngaran Kaum Girang jadi Kawunggirang nyaéta diilhaman ku ayana filosofi tangkal kawung anu loba mangpaatna, mangka ti éta ku alatan kecap kaum jeung kecap kaum téh ampir sarua, ngaran désa ieu tuluy jadi désa Kawunggirang tepi ka kiwari kalyan maksud urang Kawunggirang téh sangkan loba mangpaatna keur balaréa.

Profil Daérah

Wates Wilayah

• Désa Kertabasuki
• Désa Cigasong
• Désa Tajur

Géografis

Kawunggirang kaasup daérah luhur. Di beulah kiduleunnana diwawatesan ku Cideres nu ngawatesan jeung désa Cieurih

Transportasi

Kawunggirang aya di sisi jalan gedé, diliwatan ku jalan Kadipatén - Cikijing nu mangrupa jalur alternatif keur mudik lebaran. Tutumpakan nu ngaliwatan désa ieu nyaéta beus tilu parapat jurusan Bandung - Cikijing, mikrobeus jurusan Kadipatén - Cikijing, sarta angkutan padésaan jurusan Maja - Cigasong

Pangatikan

Di Kawunggirang aya sababaraha sarana pangatikan di antarana:

• SDN Kawunggirang I
• SDN Kawunggirang II
• MIS An Nawawiyah
• MTsS An Nawawiyah

Salian ti éta, di Kawunggirang ogé aya dua pasantrén gedé nyaéta:

• Pondok Pasantrén Shobarul Yaqien
• Pondok Pasantrén An Nawawiyah

Poténsi

Pertanian

lolobana pangeusi désa Kawunggirang hirup tina tatanén, utamana paré.