Dréstajumena

Dréstajumena
Déwanagari:	धृष्टद्युम्न
Éjahan Sansakerta:	Dhrishtadyumna
Ngaran séjén:	Prestajumna; Trustajumena
Asal:	Karajaan Pancala

Dréstajumena (Sansakerta: धृष्टद्युम्न, dhrishtadyumna) nyaéta salah saurang inohong dina wiracarita Mahabarata. Manéhna téh lanceukna Drupadi jeung Srikandi, turunan Raja Drupada anu asalna ti Karajaan Pancala. Manéhna aya di pihak Pandawa waktu perang di Kurusétra. Anjeunna nikah 100 ratu. Ti éta, ratu utamana nyaéta Déwi Saswati, Déwi Sasireka (adina Jarasanda), Ajawanti jeung Danowati. Danowati nyaéta putri Raja Salya. Ti dirina, anjeunna kagungan putra ngaranna Drestaketu. Drestaketu dipaéhan ku Karna. Manéhna anu maéhan Resi Dorna. Waktu Sang Resi tungkul leuleus sarta kaleungitan daya kekuatanana alatan béja bohong ngeunaan perlayana Aswatama (anakna), Dréstajumena maju sarta nunggel beuheung Sang Resi ku pedangna.

Harti ngaran

Dina basa Sansakerta, ngaran Dhristadyumna sacara harfiah boga harti "diagung-agung alatan wawanénna".

Kalahiran

Waktu Dorna hasil ngarebut satengah Karajaan Pancala ti leungeun Drupada, kangéwa Dorna ka Drupada lenyap, tapi sabalikna Drupada jadi ngéwa pisan ka Dorna pikeun salawasna sarta boga kahayang pikeun ngabales dendam. Manéhna nyaho yén Dorna hésé diéléhkeun sabab Dorna mangrupa murid Bargawa sarta mibanda pakarang ampuh. Tungtungna Drupada mutuskeun pikeun ngalaksanakeun upacara yadnya anu disebut Putrakama sangkan boga anak lalaki anu bisa maéhan Dorna. Kalayan dibantuan ku para resi, upacara kasebut kalaksanakeun kalayan lancat. Tina seuneu upacara, mecenghul saurang nonoman gagah, pepek jeung baju beusi sarta pakarang. Nonoman kasebut dibéré ngaran Dréstajumena.

Pati

Sanggeus perang rongkah di Kurusétra lekasan, anak Resi Dorna, nyaéta Aswatama, babarengan jeung Krépa sarta Kertawarma, ngalakonan bales dendam sarta hasil ngabinasakeun ampir kabéh putera-puteri, incu, sarta baraya Pandawa, kaasup anu jadi korban nyaéta Dréstajumena sorangan, Srikandi, sarta Pancawala. Laku kasebut dipigawé dina waktu peuting, sabot prajurit Pandawa keur saré tibra. Carita kasebut aya dina buku Sauptikaparwa.

Dréstajumena dina pawayangan Sunda jeung Jawa

Dina pawayangan Sunda jeung Jawa, Arya Dréstajumena atawa Trustajumena nyaéta anak bungsu Prabu Drupada, raja nagara Pancala ti permaisuri Déwi Gandawati, putri Prabu Gandabayu jeung Déwi Gandini. Manéhna miboga lanceuk kandung dua urang nu ngaranna Déwi Drupadi (pamajikan Prabu Yudistira) jeung Déwi Srikandi (pamajikan Arjuna).

Cenah Arya Dréstajumena lahir tina seuneu menyan hasil pamujaan Prabu Drupada ka Déwata anu hayangeun mibanda anak lalaki anu bisa ngabinasakeun Resi Dorna anu geus ngéléhkeun sarta ngahina manéhna. Dréstajumena boga rupa nu kasép, mibanda sipat wanian, cerdas, tangkas sarta tanginas. Manéhna ngadahup ka Déwi Suwarni, putri Prabu Hiranyawarma, raja nagara Dasarna. Tina lakirabi jeung Déwi Suwarni, manéhna boga dua urang anak lalaki nu dingaranan Dréstaka jeung Dréstara.

Dréstajumena milu turun dina médan perang Baratayuda. Manéhna tampil salaku sénapati perang Pandawa, nyanghareupan sénapati perang Kurawa, nyaéta Resi Dorna. Dina waktu éta lelembutan Ékalaya, raja nagara Parangggelung anu hayang ngabales dendam ka Dorna nyalusup kana diri Dréstajumena. Sanggeus ngaliwatan perang campuh, ahirna Resi Dorna bisa dibinasakan ku Dréstajumena ku cara nigas beuheungna.

Dréstajumena tiwas sanggeus perang Baratayuda lekasan. Manéhna tiwas ku Aswatama, anakna Dorna, anu hasil nyalusup asup ka karaton Astina dina upayana nungtut bales tiwasna bapana. Danowati, Dréstajumena pamajikan kaopat digambarkeun salaku ratu kahijina dina carita rakyat Indonésia jeung Jawa.

Tempo ogé

• Dorna
• Aswatama
• Sauptikaparwa